admin
Nkosilathi Sibanda
INGCITSHI zakudala kumdlalo kanobhutshuzwayo kuleli koBulawayo uRonald Sibanda, Gift Lunga Junior loZenzo Moyo sezikhuthaze abantu bakuleli ukuthi baqine ngokuhlala emakhaya abo.
Bobathathu laba baqoqonsele ukuthi zonke izinqumo eziphawulwe nguHulumende ukuthi kwenqatshelwe igcikwane leCovid-19, kumele zilandelwe.
Inkuthazo yamadoda la, adla ubhedu ethokozisa ababukeli benguqu kudala, abeke umbono lo ngesikhathi inhlanganiso abayimeleyo eyeBulawayo Football Ambassadors (BFA) ndawonye lenkampani yeCity Link zinikeza isipho se $100 000 ekulwiseni iCovid-19 koBulawayo.
Lokhu kuza ngesikhathi inkampani yeCity Link leBFA zincedisa isizwe ngaphansi komkhankaso obizwa ngokuthi: “I am 4 Bulawayo Fighting Covid -19 Trust.” Umkhankaso lo uyingxenye yesikhwama esiphathisa ukuqhutshwa kwenhlelo ezibhedlela seKusileni Medical Centre, esivulwe ngesikhathi kumemetheka iCovid-19.
Ekhuluma ngaloluhlelo, uRonald Sibanda, odume ngelithi “Gidiza” uthe bakhathazekile ngegcikwane leli elethusela ukutshabalalisa impilo.
“Njengoba singosaziwayo kumdlalo wenguqu, sibe yingxenye yalumkhankaso ngoba lathi sikubona kufanele ukuthi sincedise ekulwiseni igcikwane leli. Sithi abantu bakithi abahlale emakhaya, balandele konke abakutshelwayo,” kutsho uSibanda, osathola usekelo lenhlonipho kulabo abambona esadlala ngensuku zakhe.
UMoyo, owaziwa ngokuthi nguZemura ukhuthaze wonke umuntu edolobheni lakoBulawayo ukuthi anikele ngakho konke alakho.
“Ukunikela ngokuncinyane esilakho kuzakwengeza ekuthini sincede labo abaphathekileyo kuleligcikwane lokuthi indawo lezi ezigcine izigulane zisebenze kuhle.
“Sihlangana leCity Link kumkhankaso we I am 4 Bulawayo Trust Fighting Covid-19 Trust ngenjongo yokuthi sisize umphakathi. Nxa sihlangene sinje, siliqembu, singenza okunengi,” nguMoyo lo, ongeke wakhohlakala kumbali yeqembu leHighlanders ngokuthela amabhola entanjeni ayekwenza kuleliqembu.
Kubikwa uGidiza, uThebe loZemura labanye babo abadlala ibhola kudala bazangena ebulenjini bekhankasa nge Covid-19, ngokuthumela amavidiyo.
Kusenjalo, Amavevane Sports Club lawo athe ngeke asalele emuva.
Iqembu lakoBulawayo leli linikele ngemali engange
$25 000, okubikwa izathenga ukudla.
Online Reporter