admin
YiNtatheli kaMthunywa
UKUMISWA komdlalo wenguqu ngenxa yeCovid-19 angeke kwephule idlabuzane eliphethwe linengi labadlali bamaqembu angaphansi kweLupane Super League.
Inguqu kulindawo isincedise kakhulu ukuthi ibambanise umphakathi ohlaselwe zindubo ezinengi ezibalisa ukuswelakala kwemali, umsebenzi lokubuyela muva kwengqubekela phambili kulumhlubulo welizwe. Ngokuza kwegcikwane leCovid-19, absakhulayo abaphatheka kumdlalo basele bengela lapho abangacatsha khona nanko akusavunyelwa ukudlala ibhola lokulolonga.
Loba kunjalo, abadlali abamela amathimu ayisitshiya galombili angaphansi kweLupane Super League bazimisele ukuthi balinde kuze kuphele leli igcikwane eselethusele ikusasa yabo kunguqu.
Isikhulumi seLupane Super League uPermanent Sibanda uthe insuku azisafani kulindawo ngenxa yokuthi iCovid-19 isivale umdlalo othandwa ngabanengi.
“Umdlalo wenguqu eLupane uqakatheke kakhulu ngoba yiwo obuthanisa abantu. Kulumdlalo abantu bachitha isikhathi, bezithokozisa bekhohlwe ngendubo. Okwamanje sonke sikhathazekile,” kutsho uSibanda.
Uthe kulezi insuku ngempelaviki, isizungu sesihlasele eLupane ngoba besekuyinjwayelo ukuzwa ukukhala kwamavuvuzela abasekeli belungiselela ukuyabukela umdlalo.
Uthe amaqembu abo athembisa ukuthi azalandela abadlali, kumemetheka inkuthazo yokuthi bazigcine ngalesi isikhathi.
“Kungabe kukubi phandle kodwa abadlali lamaqembu abo bathembisa ukuthi bazalinda kwedlule lokhu okuhlasele umhlaba wonke. Inkuthazo yendlela abadlali okumele baphile ngayo iyasabalala kuzo zonke iziqinti okulamaqembu ethu khona. Wonke umuntu uyazwisisa ukuba ukumiswa kwemidlalo kwenzelwe impilakahle.
“Ithemba lokuthi umdlalo wenguqu uzabuyela kusimo sawo sakudala likhona. Nxa ngikhuluma labadlali, abaphathi labaqeqetshi, bonke bathi abakalahli ithemba.”
Kusenjalo, elinye lamaqembu adlala kuLupane Super League iMtshibini Young Stars iqhubekela phambili ilandelela abadlali bayo bonke abangu-30, ibanikeza inhlelo zokulolonga besemakhaya.
“Amaqembu siwakhuthaza ukuthi asebenzise iWhatsApp ukuthi ahlolisise abadlali ngalesi isikhathi. Kubalulekile. Sesibone leqembu leMtshibini Young Stars likwenza lokhu ngendlela encomekayo,” kutsho uSibanda.
Online Reporter