Online Reporter
Ethel Ncube
UMHLABELELI weRhumba uGodolude uzakwethula idlalade lakhe elitsha emazweni angomakhelwane athi Botswana kanye leSouth Africa.
Idlalade likaGodolude elitsha elithi; Back To Sender lizaqala ukwethulwa eSouth Africa eYeoville ekupheleni kukaMfumfu.
Ekhuluma lentatheli uGodolude uveze ukuba uzabhoda amazwe amabili esethula idlalade leli, elikhuluma ngezehlakalo zempilo kanye lokuhlukumezeka abantu abahlangana lakho.
“Ngiledlalade engizalethula eSouth Africa laseBotswana kunye lalapha ekhaya. Kungokokuqala ukwethula idlalade ngalindlela. Ngifisa ukulanda abalandeli bami emazweni abasebenzela kuwo ngoba ngifuna ukuthi bazibonele mathupha isitayila engisiphetheyo emculweni.
“Idlalade lami leli elithi; Back To Sender lilengoma ezingu-8 ezithi; Umhambuma, Isibindi seLiquor, Impumelelo Iyangibiza, Isilonda Sothando, Back To Sender, One Point futhi zonke zihlatshelwe ngesiNdebele.
“Nginxusa bonke abalandeli bami ukuthi bafike lapho esizakwethula khona idlalade emazweni la bazozizwela uluju lwendlebe,” kubika uGodolude.
Ubuye waveza ukuba unxusa wonke umuntu ukuba azozizwela ingoma lezi zisethulwa.
“EMzansi ngizabe ngikhonale mhlaka 31 kuyonale inyanga kaMfumfu. Ngikhangelele ukuba abantu bagcwale ngoba ingoma lezi ngizibhale ngisenzela ukujabulisa bona.
“Kuthi mhlaka 28 Lwezi ngizalethula koBulawayo eHappy Valley kuthi eBotswana ngizabavakatshela mhlaka 29 Lwezi eGaborone lakho ngithi balandeli bomculo wami asibuyeni ngobunengi lingisekele umculo ngowenu siphakanyiswa yikusekelwa yini ngazo zonke izikhathi,” kuphetha uGodolude.
