admin
Thokozile Mbedzi
KULENINA elileminyaka engu-71 eletheswa icala lokuzama ukubulala abantu abalitshumi esililweni esiqintini seLuvuluma eMadlambudzi ePlumtree kulandela ukuvuvuzela itshefu phakathi kwenkonxa yamanzi.
Kubikwa abalitshumi laba ngemva kokunatha amanzi la ayevuvuzelwe itshefu, mhlaka 7 Lwezi baqala ukukhala ngezisu lobuhlungu emphinjeni okwenza baze bathwalelwa esibhedlela sePlumtree Hospital.
Ekhuluma lentatheli kaMthunywa uNkosazana Hlengiwe Ngwenya uthe lokhe bedlela evalweni ngesibindi sikagogo lo.
“Lokhe sisevalweni silapha, ugogo lo wafaka umuthi emanzini abantu abangu-10 bawanatha baqala ukukhala ngezisu lemphimbo. Bonke babelezibonakaliso ezifananayo.
“Elinye inina elasola isenzo sikagogo lo lacina linyenyezela abanye ukuthi libone ugogo ephansi kwenkonxa yamanzi okwenza baze bathwalelwa esibhedlela,” kulandisa uNkszn Ngwenya.
Ukuchwayisisa kwamapholisa kuveze ukuthi kukhona okwavuvuzelwa phakathi kwamanzi la. Isikhulumi samapholisa elizweni uAssistant Commissioner Paul Nyathi uthe amapholisa eMadlambuzi adingisisa ngesehlakalo esikholelwa ukuba ngumuntu obezama ukubulala.
“Kulabantu abalitshumi ababesemkulwini esililweni abanatha amanzi okucatshangelwa ukuba ayeletshefu okwenza babulawa yizisu kunye lemphimbo.
“Omamangala bahanjiswa esibhedlela lapho abafika belatshwa bakhitshwa,” kuphetha uAsst Comm Nyathi.
Online Reporter