Online Reporter
Nkosilathi Sibanda
NXA kukhulunywa ngabaculi asebebubone bonke ubuhle lobubi kwezokuthokozisa uzulu, kubalwa loJeys Marabini.
Ngemva kokupheka amadlalade kuminyaka embalwa edluleyo, umculi wodumo lo usebike ukuba mhlaka 31 Ntulikazi uzakwethula eletshumi lanye, alibiza ngokuthi, uMjolo.
Uthe idlalade leli, elizasukumisa abantu ngobunandi bamaphimbo lomdumo weziginci.
“Libekwa emphakathini mhla zisithi 31 kuNtulikazi 2025 idlalade lami letshumi lanye,” kutsho uJeys ebikela intatheli yephephandaba likazulu ngoLwesibili.
Idlalade elilengoma ezilitshumi ezithi: UMjolo, Ngezama Lobolo, Themba Lami Likuwe, Yini Lo Mona, Mazwane, Thul’ Ulalele, Nomakanjan, Inkemenkeme, Ulal’ Ephenduka, We Mnano Muntu.
“Ngalelidlalade ngithanda ukwethula ngezehlakalo ezitshiyeneyo engidlule kuzo empilweni njengomculi. Kube lobuhle lobubi kodwa ngikutshengise lokhu ngengoma ezithinta inhliziyo, ezinye zihlasimulisa umzimba zinikeze idlabuzane.
“Engingakutsho yikuthi uMjolo lidlalale eliqinisekisa ukuba yimi kwami njengendoda ehlonipha amasiko, ukuthula, ukubambana lokukhankasela ingqubekela phambili yoluntu lwethu. Ngikwenza lokhu ngokuhlabela, ngixhumane lozulu, ngibeka indaba yohambo lwami,” kutsho uJeys.
Ekuqoqeni idlalade, uJeys uthe usebenze lengcitshi kwezomculo lokwenza amavidiyo kuleli. Kubaculi labatshayi besiginci, usebenze loMzoe7, Smallz, Erustus Nleya, Just Percy, Obey Mudiwa, Master H (bass guitar), Rodwell Roda, Mthabisi Moyo, Thomas Madurure (ku-lead guitar), Oktopas (keys), Simba (ku-trumpet), Benjamin (saxophone), Nash (trampoline), Bonginkosi (ku-percussion), Brian Awa, Khulekani loGazi Elimnyama.
“Ngethula isibongo esikhulu kubo bonke abaphathise ukuphekweni kwaleli dlalade. Bonke abaculi labatshayi beziginci.
Isibongo esikhulu siyakuNathaniel “Oktopas” Chipunza uprojusa wethu. Sibonge njalo loMatesu Dube obekhokhela ekuthwebuleni amavidiyo.”
UJeys uthe idlalade lakhe laphekwa kumastudiyo amane abalisela iLoud Records, Just Percy Studios, Elephant Head Studios leP3 Studios.
