admin
Nkosilathi Sibanda
ABAQEQETSHI beHighlanders uAmin Soma-Phiri lomkhulu wakhe uCosmas Zulu asibaqeqetshi abangaqhubeka bekuleli qembu ngoba bakhona abangcono kulabo, kubika uNdumiso Gumede umaqhuzu wethimu.
UGumede wethule lokhu ngeviki edluleyo watshiya uZulu loPhiri bebambe owangaphansi phambili kwentatheli.
“Laba (uZulu loPhiri) asibantu esingagxila ngabo eqenjini. Banengi abangenza umsebenzi lo kwelizayo,” kutsho uGumede andubana ethule umbiko wokuthi sekulabaqeqetshi abedlula isikhombisa asebephosele amaCV okudinga umsebenzi kamqeqetshi.
Amazwi kaGumede la atshengise ukuthi ukuqhatshwa kukaPhiri loZulu kwenziwa ngesiphangiphangi njalo ayisibo abaqeqetshi okwakumele bephiwe umsebenzi.
UZulu walile ukuphendula amazwi kaGumede.
“Okunengi ngibona kungcono ukhulume labadala.Yebo sicina ukusebenza ngoMpalakazi kodwa lami ngizibona ngiseselomsebenzi omkhulu kuqembu.”
Ukubakhona kwabaqeqetshi laba kubikwa sekubhidliza ubudlelwano obukhona kubhodi yeBosso kanye lenkokheli zequla le-executive. Izizatho zalokhu ngokutsho kwabasiki bebunda yikuthi uZulu loPhiri akulanguquko abayilethayo kuthimu le.
UZulu loPhiri bangena ngemva kokuxotshwa kukaBongani Mafu.
Loba ababili laba bengazange basayine isivumelwano sokusebenza kuHighlanders, kuyaziwa ukuthi umsebenzi wabo uyaphela kulisizini.
Abaqeqeqtshi asebetshengisele isifiso sokukhuza iHighlanders nguErol Akbay, uMark Harrison owake waqeqetsha iCaps United, uDesmond Bulpin okwakumele aphiwe umsebenzi phambili kukaMafu, uDean Mwende oweZambia, uAnteneh Eshete oweEthopia, uKinnah Phiri weMalawi loJeff Cook wakweleMelika.
Kusenjalo, kudaba oluzakhuba imimoya yabalandeli beHighlanders, kubikwa kulabadlali abedlula isikhombisa abazatshiya iBosso.
Iphephandaba likazulu alisatholanga amabizo abadlali laba kodwa isizatho sokusuka kwabo yikwehluleka kweBosso ukubanika imali yesivumelwano sokudlala ama-signing on fees.
Inengi labadlali kulisizini belitshibilika mahala lincedwa liholo kuphela.Umgcinisihlalo wethimu uPeter Dube kubikwa utshaywa likhanda engazi ukuthi aluphathe njani udaba lokwethuselwa ngabadlali.
Online Reporter