Online Reporter
Ethel Ncube
KULENDODA eleminyaka engu-20 yelokitshini leNtumbane egwaze enye ithangazi yedlula emhlabeni ngoLwesibili kubangwa isikhwili.
Umetheswacala uMxolisi Ncube (20) kubikwa ugwaze uMaqhawe Nkomo (25) kulandela ukuba ehlangane laye ehamba labangane bakhe.
Kubikwa uNcube wabuza uNkomo ukuthi kungani wamtshaya elabangane bakhe.
Kubikwa uNkomo waxolisa wazama ukumchazela ukuthi yena kazange amtshaye kodwa wayebhula umlilo njengoba kwasekuliwa. UNcube kazange akulalele lokho kodwa wakhupha ingqamu wagwaza uNkomo emathangazini wafulathela.
Abangane bakhe bahamba laye emapholiseni ngokuswelakala kwenhlanhla i-ambulensi yathi ifika wayesedlule emhlabeni.
Isikhulumi samapholisa koBulawayo uInspector Nomalanga Msebele ubike ukuba sebebophe uNcube.
“Sibophe uMxolisi Ncube osolwa ngecala lokubulala uMaqhawe ngokumgwaza. Sicela uzulu atshiyane lodlame ngoba kucina kudala ukulahleka kwempilo. Sixwayisa uzulu ukuba atshiye umkhuba wokuthwala izikhali ezilimazayo,” kubika uInsp Msebele.
