admin
Thokozile Mbedzi
ZIKHAKHAMELE izakhamizi zesigabeni seUpperstone eMbembesi indawo eseWest Nicholson ngemva kokuba amadoda amahlanu egwaze umngane wabo umzimba wonke wafa ngoba becabangela ukuthi utshontshe impahla zabo.
UDanisile Dube obeleminyaka engu-28 wesigabeni seMashura eMberengwa ubhubhe mhlaka 8 kuyonale inyanga.
Ngalelolanga kubikwa uDube wayenatha utshwala ezihlalele loMlondolozi Bhebhe oleminyaka engu-29, abangane bakhe abahlanu bafika bamcela ukuthi baye endaweni ensitha ukuze bakhulumisane bafika bamgwaza umzimba wonke besithi ubatshontshele impahla zabo kodwa bemcabangela.
Ekhuluma lentatheli kaMthunywa uMnumzana Joel Moyo uthe balokwesaba ngokwenzakeleyo ngoba abangane bakaDube bambulele kodwa bengelabo ubufakazi bokuthi utshontshile.
“Abafana laba bangabangane kodwa kukhanya sebecatshelwe zimpahla bacabangela uDube basuka baya laye egangeni kungathi bayakhulumisana bona bafika bamgwaza umzimba wonke bamtshiya ethe daca badliwa ngumswenya.
“UDube waze wabonwa ngenye indoda eyayisedlula wathwalelwa esibhedlela seGwanda andubana adluliselwe koBulawayo eUnited Bulawayo Hospitals lapho afika wabhubhela khona ngoLwesibili kuviki edlulileyo,” kulandisa uMnu Moyo.
Isikhulumi samapholisa esabelweni seMatabeleland South ulnspector Philisani Ndebele ebuzwa ngodaba lolu uthe solufikile ewofisini yabo njalo ucele uzulu ukuthi ancedise amapholisa ukuze izigilamkhuba lezi zibanjwe.
“Samukele umbiko wendoda etholakale igwazwe umzimba wonke njalo sicela uzulu asebenzelane lamapholisa ukuze labo abenze icala leli babotshwe.
Online Reporter