admin
Thokozile Mbedzi
ZILOKHU zitshwaqe umzimba izakhamizi zesigabeni seMadzivhe eSiyoka ngemva kokugwazwa kwenye indoda yafa ngabangane bayo kuviki ephelileyo.
UCharles Ndou okungasatholakalanga iminyaka yakhe yokuzalwa kubikwa waba lokungazwisisani labangane bakhe, uBornface Mbedzi lomnawakhe ngesikhathi benatha utshwala okuyikho okucine kubangela ukuba uMbedzi amgwaze ndawonye lomnawakhe okungasatholakalanga igama lakhe.
Kuzwakale ukuthi uNdou wasuka emnyameni lapho ababenathela khona waya ekukhanyeni kwesinye isitolo wafika watshela abantu ababelapho ukuthi uBornface lomnawakhe yibo abamgwazileyo andubana awele phansi wahle wafela lapho.
Ekhuluma lentatheli kaMthunywa uMnumzana James Sibanda uthe lokhe elesithuli ngesiga lesi.
“Lokhe sididekule ngesiga lesi ngoba abafana laba bakhelene njalo labo abambuleleyo bayizelamani.
“Asazi ukuthi izaphathwa njani lindaba futhi silokhu sibuzana ukuba abafana laba benzeleni isenzo esifana lalesi kodwa kasiyitholi impendulo,” kuchaza uMnu Sibanda.
UMlisa wakulindawo uMnumzana Liberty Mleya ebuzwa ngodaba lolu uvumile wathi lwenzakele njalo luyisimanga.
“Udaba lwabafana ababili abagwaze omunye wafa lwenzakele sibili.
“Asazi sibili ukuthi kubangweni etshwaleni lapho kodwa sizadingisisa ngomonakalo lowu labaphathi besigaba labomthetho njengoba sebebikelwe,” kuphetha uMnu Mleya.
Imizamo yokukhulumisana lamapholisa yehlule.
Online Reporter