admin
Ethel Ncube
OKUQALE njengengxabano yokuba kutshintshwe ingoma ebikhala emtshoveni kucine kutshiya isidumbu phansi nanko phela lo oyale ukuthi itshintshwe ucine egwazwa ngepiki esiswini okubangele ukuthi ahle afele lapho.
Umuyi okungasatholakalanga ibizo lakhe ubhubhe ngeviki ephelileyo emgodini weWaterwish esigabeni seNyathi.
UMthunywa uzwe ukuthi izihambi ebezisemtshoveni obusiya eNyathi ziqale ziyitshaya indiva ingxabano phakathi kwamadoda amabili okucatshangelwa ukuba ngomakorokoza, omunye ethi ufuna kutshaywe iNdolwane omunye laye efuna uMagwaza.
Esinye isakhamuzi uMnumzana James Moyo uthe kulomuntu owabulawayo kubangwa ingoma.
“Udaba lolu lwenzakala sibili eWaterwish lapho okugebha khona omakorokoza abanengi abavela endaweni ezitshiyeneyo. Abantu laba kayisibo balapha. Besivele sibona ngendlela abagebha ngayo bebanengi ukuthi kwelinye ilanga kuzakufa umuntu.
“Abantu laba babegade umtshova bonke bevela ezitolo zeNyathi bathi besendleleni omunye wathi kakukhutshwe ingoma eyayikhala kufakwe ingoma kaMagwaza umsindo wahle waqala lapho bahamba sebebambelane izikhwili,” kutsho uMnu Moyo.
“Umtshova uthe ufika lapho okwakumele kwehlele omunye walaba ababexabana wamisa imota, lo omunye wasesehla esiya chitha amanzi kanti wayesezipheke ngebhojwana nanko phela bahle bamgama beliqula bamtshaya waze waqaleka besithi kungani eyale ukuba kutshintshwe ingoma.
“Umnewabo wathi ezama ukumlamulela bahle bamudla ngepiki bamgwaza ngakolunye uhlangothi lwesisu yayaphuma kolunye. Amathumbu ahle aphumela egcekeni, ngokusweleka kwenhlanhla wawela phansi wahle wedlula. Omakorokoza laba bathi bebona ukuthi sebebulele umuntu bacela ezinyaweni njalo lokhu kungaziwa ukuthi bangena kuwuphi umlindi,” kutsho uMnu Moyo.
Intatheli iphinde yakhulumisana losobhuku ohlala kwesinye isigaba esiseduze lalapho okwenjiwa khona igolide uMnumzana Joburg Ncube othe udaba olunjalo lwafika endlebeni zakhe.
“Ngayizwa indaba yomuntu owagwazwa ngepiki kubangwa ingoma emtshoveni kodwa ababili laba kayisibo balapha.
“Lo owabhubhayo isidumbu sathathwa ngamapholisa ahamba laso, kutsho ukuthi izihlobo zakhe sezamthatha ngoba lathi asikwazi ukuthi ngowangaphi,” kutsho uMnu Ncube.
Ekhuluma lentatheli umnikazi wendawo lapho okwenjiwa khona, uMnumzana Ishmael Kaguru uchaze ngamakorokoza la.
“Abafana laba abagebhayo bayesabeka, ngake ngayabikela amapholisa ukuze babaxotshe kodwa kabazange balugxobe lapho. Khathesi sokufe umuntu nampa sebelindile.
“Sikhuluma nje abanye sebehlala emasimini njalo batshontshela izakhamizi izilimo. Sifuna ukuthula lapha kungakho silethemba lokuthi amapholisa azasiphathisa,” kuchaza uMnu Kaguru.
Intatheli zivakatshele kule indawo okwabulawelwa khona indoda le lapho ezithe zifika zahlangana lamapholisa agcina ukuthula kuleyondawo elinde ngemibhobho.
Elinye ipholisa elingathandanga ukuqanjwa ngebizo ngoba lingavunyelwa ukukhuluma lentatheli livumile ukuba kulomuntu owafela kuleyondawo.
“Silande ukuzogcina ukuthula lapha ngoba kulomuntu awabulawelwa lapha. Okunengi ngombiko lo lingakuthola emapholiseni aseNyathi,” kubika lelopholisa.
Online Reporter