admin
Wayne Ncube
KULENDODA yeChachachunda eHwange egwetshwe ukuyapika ejele iminyaka eyisitshiya galolunye kulandela ukutholakala ilecala lokutshontsha inkomo kamakhelwane wayo.
Umsolwa uElvis Moyo oleminyaka yokuzalwa engu-30 yokuzalwa uvele phambi kukamantshi uAelene Munamati emthethwandaba weHwange ngoLwesihlanu ngeviki ephelileyo esetheswa icala lokutshontsha inkomo kamakhelwane wakhe.
Umsolwa kazange achithe isikhathi senkundla ngoba uhle walivuma icala lakhe.
Umtshutshisi kulelicala uMnumzana John Chisango Mutykaviri ubikele inkundla ukuthi ngoMbimbitho nyakenye uMoyo wahamba emadlelweni eKasane wafika waqhuba inkunzi kamakhelwane wakhe wayayibophela esihlahleni esadinga ukuba ayibalekise njani kuleyondawo.
Uqhubekele phambi ebikela inkundla ukuthi umamangala ebona engasayiboni inkunzi yakhe waqala ukubhoda ebuza ukuba ingabe izwakalele ngaphi, andubana abikelwe ngezinye izakhamizi ukuthi yabonakala ibotshelwe esihlahleni ngumsolwa.
Kubikwa umamangala esiyafika kulesosihlahla umsolwa wayeseqhube inkunzi leyo wayayithengisa okuyikho okwabangela ukuthi ayebikela amapholisa okwenza umsolwa wabotshwa.
Umantshi esezwile icala leli uqume ukuthi umsolwa ayepika ejele iminyaka engu-9.
Online Reporter