admin
Mehleli Dube
BAKHONA omalukazana abathi besenda bejonge ukuba zimpehlani kumbe amadungamanzi, athole umdeni uhlezi ngokuthula kulokuzwana lokujabula njalo bebona ngaso linye. Kanengi ufika ethi uloywa ngumamazala kumbe ubabakazi.
Ufika athole umdeni ukhonza kubandla labo ndawonye abaguqule, athi elabo ibandla alimazi uMsindisi akungenwe elakhe, kanengi yilezi isonto zemimoya abathi bona bayabona okusemakhazeni, into ingakenzakali bona bakholelwa ukuthi bahle balimukiswe ngumoya.
Ozama ukwala ukulandela okufunwa ngumafikozolo lo umane abeyisitha esikhulu. Angabona ukuthi umdeni ubambene awugudluki endleleni yawo, uvele adanele kumkakhe athembise ukumtshiya abuyele kibo.
Ngenxa yokuthi uthando luyabe lusaphuphuma njalo esenakana ngezimali zamalobolo ayabe ezikhuphile acine evuma okufunwa ngumakoti wakhe. Phela abanye omakoti baphenduka onompembe ekamelweni yena ohlala impembe yakhe isemlonyeni eqondisa amaphutha.
Uzakhuluma kuze kuse acine ekhohlwa lokudla isithelo semvelo, avuke umyeni wakhe ekhathele, edinwe angani ngumuntu akade egijima etshebetshebeni kaNgulukudela. Ufice umyeni esezacile ngoba kuyabe sekumele akhethe phakathi kukamakoti wakhe lomdeni.
Kuvamile ukuzwa umalukazana ethi uloywa nguninazala ejonge ukuthi umkakhe ahlubeke kwabakibo, abugubule ubuhloko njengenhlathu eginye ithole lenkonkoni. Kudingwe lezinyanga labaphurofethi bahle labo bekelele ngokuthi uninazala uyingozi kakhulu empilweni zabo, kungcono basuke phansi kwakhe bayehlala khatshana laye.
Siphile nzima isalukazi seNkosi ngoba siyabe singathunyezelwa lutho, mhlawumbe yindodana yaso esiyithembileyo, sidle luklubhu sona sazala safundisa silenjongo yokuthi ukuzala yikuzimbela.
Isimanga yikuthi umyeni wakhe angathi unina uyaloya uzonda anuke okobulongwe bechalaha obunethwe yinsewula kaMpandula. Kwesinye isikhathi amadoda ngobuthutha athatheke avume ukuyengwa azihlube kwabakibo, akhohlwe ukuthi umakoti uyakutshiya loba selihlezi iminyaka engamatshumi amahlanu litshadile abuyele kibo, lapho usuvuleka inkophe uthole ukuthi sekonakele, akusela muntu okunamathelayo.
Ayixabene.
Umlobi uthinteka ku 0714355641
Online Reporter