admin
Thokozile Mbedzi
KULENDODA yesigabeni seBekezela eFilabusi emangalise uzulu ngemva kokuba ihlahlele umkayo ngehloka qede yazibulala ngeviki ephelileyo.
Kubikwa ulnnocent Chandakawona uxabane loNkosikazi wakhe, uDelight Honera ngoba bengathembani wasemgamula kanengi nengi waze waquleka.
Ekhuluma lentatheli kaMthunywa uNkosazana Sibongokuhle Ndlela uthe kabala nkani ngesehlakalo lesi.
“Sidabukile silapha ngesimanga esenziwe ngu-lnnocent yena ohlahlele unkosikazi wakhe ngemva kokuxabana ngokungathembakali emtshadweni wabo.
“Ulnnocent uhle wamsusela amanqe umkakhe wamhlahlela ngehloka kanengi nengi waze waquleka.
Uthe ebona ukuthi umkakhe usequlekile wasuka wayazibophela laye ephahleni lwendlu yabo.
“Ngemva kwesikhathi unkosikazi wakhe waphaphama, uthe engena endlini yabo yokulala wathola umkakhe elenga ephahleni wahle wahlaba umkhosi ebiza abantu ukuze bamsize.
“Abantu bathi befika bananzelela ukuba laye wayelimele umzimba wonke kungakho basebesiyabikela amapholisa,” kulandisa uNkszn Ndlela.
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uthe solufikile ehofisini yabo.
“Udaba lwendoda egamule uNkosikazi wayo qede yayazibophela solufikile ehofisini yethu ngakho uzulu nxa kusuke kwaba lokungezwani kabikele abaphathi bezigaba kumbe amapholisa ukuze singalahlekelwa yimpilo mahlayana nje ngalokhu,” kuphetha ulnsp Mangena.
Online Reporter