admin
Listen Ndlovu
INKAMPANI ebona ngokulungiswa kwenhlanyelo eyePrime Seeds koBulawayo isikhuthaze abalimi ukuba balime amathanga ngoba athandwa ngabanengi okungenza umlimi azitholele inzuzo enhle.
UMnunzana Motion Mutengwa osebenzela inkampani yePrime Seeds uthe amathanga akhula kuhle endaweni elelanga ngakho umlimi kumele akhethe indawo yakhe ethola ilanga elinengi lapho azahlanyela khona amathanga akhe.
“Amathanga adinga umhlabathi olokudla okunengi ngakho umlimi uyakhuthazwa ukuthi afake umhlabathi wakhe umquba omnengi njalo abone ukuthi umquba lenhlabathi kuyahlangana kuhle andubana afake inhlanyelo yakhe,” kutsho uMnu Mutengwa.
Uqhubeke esithi nxa umlimi esehlanyela angenza imizila loba enze imbundu emncane lapho azahlanyela khona.
“Ukwenza imbundu kuvikela isilimo ezibungwini ezidala ubudli njalo kwenza umhlabathi ukhudumale okwenza ukuthi inhlanyelo iphangise ukumila.
“Imubundu umlimi azahlanyela kuyo kumele itshiyane ngamamitha angu-4 kuthi nxa ehlanyela emzileni kumele amagodi atshiyane ngamamitha angu-6m,” kutsho uMnu Mutengwa.
Uthe amathanga yisilimo esifuna amanzi amanengi ngakho umlimi uyakhuthazwa ukuba athelele isilimo sakhe ikakhulu nxa sesihlanzile.
Uphethe ngokuthi okunye okubalulekileyo kumlimi olime amathanga yikuhlakulela ngoba isilimo lesi kasizwani lokhula.
Online Reporter