Online Reporter
Fairness Moyana eHwange
KULENDODA yeBinga esabelweni seMatabeleland North esebuhlungwini edinga usizo kulandela ukuhlaselwa yindlovu lengwenya.
UMnumzana Winders Muleya waqunywa inyawo zombili lesandla sokudla eMpilo Central Hospital koBulawayo ngemva kwesehlakalo lesi esenzakala emfuleni uMlibizi kumaviki amathathu adluleyo.
Odokotela bakubona kufanele ukumquma isandla sesandleni sokudla lenyawo ngenxa yokulimala okukhulu ayekutholile. Unyawo lwesibili lwaqunywa ngemva kokuba engenwe ngamagcikwane konakala imisipha.
UMnu Muleya usile ngendlela emangalisayo ngemva kokulwisana lengwenya eyamhlasela ngesikhathi eziphosa emfuleni ebalekela indlovu eyayimgijimisa.
Ekhuluma lentatheli esembhedeni wakhe esibhedlela seMpilo ngaphambi kokuyadinga ukwelatshwa eZambia, uMnu Muleya uchaze ngokwamehlelayo.
“Kwaku lihola lokuqala emini. Mina lenye indoda engangilayo siselusa inkomo zethu. Sasitshintshana ukuya emfuleni sidinga isitshebo ngoba kwakunzima ukusithola. Njengoba sasibabili kuphela, sasikwenza lokhu ukuze sivikele inkomo zethu kumasela avela eZambia. Kwathi sekuyisikhathi sami sokuthi ngiye emfuleni, ngabona umhlambi wendlovu ezinhlanu zingilanda,” kutsho indoda le.
Uthe wazama ukuzixotsha ngokutshaya isitsha sensimbi ayesithwele kodwa lokhu kwazicasula kakhulu.
“Ngaya lapho okwakulendlovu eyodwa ngiqhubeka ngisenza umsindo. Yangihlasela ngase ngiziphosela emfuleni ngingacabangi, ngifuna ukucwila ngaphansi kwamanzi. Bengingazi ukuthi indawo le igcwele ingwenya. Enye yangigxavuna isandla yasekela kodwa yabuye yangibamba inyawo zombili,” kutsho uMuleya.
Ngenhlanhla kwakulabantu ngakwelinye icele lomfula, okungamamitha alikhulu ukusuka lapho, abezwa ehlaba umkhosi edinga uncedo.
“Bafica ngilwisana lengwenya eyayizama ukudabula unyawo lwami. Yakhutha unyawo, yabamba ibhulugwe lami elifitshane. Ngasengiyigada phezulu ngabamba ikhanda layo lingangeni emanzini. Ngase ngifaka isandla sami emlonyeni wayo, okwabangela ukuthi ulaka lwayo lwehle. Kodwa enye ingwenya yazama ukungihlasela, ngancedwa ngobaba abahlanu abafika bephethe izigodo.”
Uthe ngesikhathi abamncedayo betshaya amanzi ngenduku lezigodo, ezinye ingwenya zasuka zabaleka, kwathi le ayeyibambile layo yamekela.
“Yangidedela ngemva kokuba omunye wabangincedayo esondele kimi wayitshaya ngamandla esiswini ngogodo. Kodwa ngesikhathi ngikhipha isandla sami emlonyeni wayo ngase ngilimele kakhulu.”
UMuleya, oleminyaka engu-42 yokuzalwa njalo ephila ngokuthiya inhlanzi, ulabantwana abathathu. Uthe impilo yakhe isiguquke kakhulu ngenxa yokukhubazek aselakho.
“Bengiphila ngokuthiya inhlanzi ngaphambi kwalesi sehlakalo. Khathesi angisenelisi ukusebenza. Ngilabantwana abafundayo njalo badinga ukunakekelwa. Sengikhubazekile ngakho ngicela usizo kuloba ngubani ongangincedisa.”
Umzawakhe, uMnumzana Tendayi Zulu, uthe umdeni ucela imali yokubhadala izikwelede zesibhedlela.
“Sidinga kakhulu uncedo ukuze sibhadale isikwelede sesibhedlela esesifike ku-$261 780. Sesenelise uWinders saya eZambia ukuze athole okunye ukwelatshwa njalo khathesi ulaliswe esibhedlela eLivingstone. Sicela uzulu lamankampani uusincedisa angasithinta ku-0776 808 607,” kutsho uMnu Zulu.
