admin
Hlolisisa izenzo ezilandelayo: -fa, -fela, -fisa, -fiwa. –dla, -dlela, -dlisa, -dliwa. –thola, -tholela, -tholisa, -tholelwa, –sukuma, sukumela, -sukumisa.
Esikuqaphelisa ngalezizenzo ezingaphezulu yikuthi lanxa isenzo singaze sibe siguquka ngayiphi indlela kukhona ingxenye yaso engaguqukiyo ezinjengalezi: fa – f, fela – f, fisa – f, fiwa – f, dla – dl, dlela – dl, dlisa – dl, -dliwa – dl, thola – th, tholela – th, -tholisa – th, tholelwa – th, -sukuma – sukum, -sukumela – sukum-, -sukumisa – sukum-
Izivumelwano zesenzo
Isenzo singasetshenziswa lezivumelwano eziyimihlobo emibili: 1. Isivumelwano senhloko 2. Isivumelwano sikamenziwa
Fundani imitsho elandelayo ukuze lizwisise isivumelwano senhloko: Umfana uyahamba. Izinyane liyahamba. Ukufa kuyahamba. Uchago luyachitheka.
1. Emitshweni engaphezulu sinanzelela ukuthi ingxenye yesenzo esekuqaleni yenza isenzo sivumelane lebizo eliyinhloko yomutsho.
2. Okunye esikuqaphelisayo yikuthi ziyatshiyana lezingxenye kusiya ngezigaba zamabizo ayinhloko yemitsho yethu.
3. Okokucina esikubonayo yikuthi ingxenye zonke lezi zisekuqaleni kwesenzo.
Zona lezingxenye zezenzo ezitholakala ekuqaleni kwesenzo zisenza isenzo sivumelane lenhloko yomutsho zithiwa yizivumelwano zenhloko.
Isivumelwano sikamenziwa
Funda imitsho elandelayo: Umfana uqhuba inkomo. Ugogo uphothula uhayezi. Umbalisi ufundisa abantwana.
Sizaqala lapha kuviki ezayo.
Hlala uhlanzekile uvikele ubhubhane lweCOVID 19. Hlala ngekhaya nxa kungela sizatho esikhulu esikwenza uphume ngekhaya. Ukhona umkhuhlane lo. Kumele siwuvikele hatshi ngoba uhulumende esitsho njalo kodwa ngoba uyingozi kuye wonke umuntu.
Online Reporter