Online Reporter
YiNtatheli kaMthunywa
UHULUMENDE ubika ukuba uhlelo lokulinywa kwengqoloyi ebusika luqhubeka kuhle elizweni lonke njengoba abalimi sebenze umsebenzi omkhulu wokuhlanyela.
Ekhuluma emhlanganweni wabalimi bengqoloyi eGlendale, eMashonaland Central, uMphathintambo wogatsha lwe-Agriculture, Mechanisation and Water Resources Development uDokotela Anxious Masuka uthe balethemba lokuthi ilizwe lizathola isivuno esihle lonyaka.
Uthe uHulumende uhlose ukuthi kulinywe amahekitha angu-125 000 engqoloyi lonyaka, okukhangelelwe ukuthi atholise ilizwe amathani angu-662 500.
“Khathesi sesilime amahekitha angu-23 595 elizweni lonke njalo angu-14 151 asehlumile. Lokhu kutshengisa ukuthi abalimi bazimisele ukusebenza ukuze ilizwe lithole ukudla okwaneleyo,” kutsho uDkt Masuka.
Uthe eMashonaland Central sekulinywe amahekitha angu-3 615 njalo inani leli likhangelelwe ukukhwela ekupheleni kwenyanga.
“Siyathokoza ngendlela abalimi abasebenza ngayo. Uhlelo lolu luqhubeka kuhle ngenxa yokusebenzisana kukaHulumende, abalimi lamankampani ancedisa ngokulima.”
UDkt Masuka uthe uhlelo lwePresidential Input Programme, oluhambisa inhlanyelo lenye impahla yokulima kubalimi, luyaqhubeka lusiza kakhulu.
Uthe i-Arda lohlelo lwe-contract farming kuyancedisa ukuthi abalimi bathole usekelo oludingakalayo ukuze bavune kuhle.
“Uhlelo lwePresidential Input Programme luqakathekile kakhulu ekuncediseni abalimi. I-Arda kanye labanye abasebenzisana labalimi kuyancedisa ukukhuphula isivuno sengqoloyi,” kutsho uDkt Masuka kumbiko wakhe.
Uthe inkampani yamagetsi, iZesa Holdings ithembise ukuqhubeka inika abalimi amagetsi, kuthi Zimbabwe National Water Authority ithe amanzi okuthelezela akhona.
“Sithokoza ngokuthi iZesa leZinwa basebenzisana lathi ukuze abalimi bangasweli amagetsi lamanzi. Lokhu kuqakathekile ukuze sithole isivuno esihle,” kutsho uDkt Masuka.
Ugatsha lwe-Agriculture, Mechanisation and Water Resources Development lubike ukuba abanye abalimi abakade bekulumhlangano bathe balethemba lokuthi ilizwe lizathola isivuno esikhulu ngenxa yokuthi inhlanyelo lezinye izinto zokulima sezitholakala ngesikhathi.
