Sidumisile Mabena
Raymond Jaravaza
UHULUMENDE useveze ukuba uzaxolela izibotshwa ngomnyaka ka-2026, lapho uMongameli uMnangagwa okulindelwe ukuthi asebenzise amandla akhe, ePresidential Clemency, okuxolela izibotshwa ngaphansi kwesisekelo sombuso welizwe.
Lokhu kuhlose ukwehlisa inani labantu emajele lokukhuthaza ukulungiswa lokubuyiselwa kwezibotshwa emphakathini.
Loluhlelo olwaziwa ngokuthi yiGeneral Amnesty, luyingxenye yenguquko kuhlelo lwezokwahlulela okuhambisana lomlandu weZimbabwe Prisons and Correctional Service (ZPCS) wokuqondisa abaphambukayo, ukubaphatha ngobuntu kunye lokubabuyisela empilweni ejwayelekileyo.
Izibotshwa ezitshengise ukuziphatha kuhle lokulungela ukubuyiselwa emphakathini yizo okulindeleke ukuthi zithethelelwe kuloluhlelo.
Ekhuluma ngemva komhlangano wokuqala weKhabhinethi lonyaka ngoLwesibili, uMphathintambo wogatsha lwe-Information, Publicity and Broadcasting Services uDokotela Jenfan Muswere, uthe uhlelo lolu luvunywe yiKhabinethi.
“Ukuthethelela kukaMongameli kuhlose ukunciphisa umthwalo emajele, lokudala indawo elempilo ephephileyo lokunika ithuba kwabaguqukileyo ukuthi bakhe impilo entsha.
“Izibotshwa ezizathola ukuthethelelwa kuGeneral Amnesty ka2026 ngezesifazane zonke, abantwana, izibotshwa ezigwetshwe inyanga ezingu-48 kusehla lalezo ezigulayo,” kutsho uDkt Muswere.
Ezinye ezizancediswa zigoqela lezo ezisemajele avulekileyo, ezikhubazekileyo, ezileminyaka yokuzalwa eyedlula i-60, abagwetshwe impilo yonke, kusiya ngokuthi sezihlale ejele iminyaka engafika engu-20.
Izibotshwa ezivalelwe phandle ehlelweni yilezo ezake zathethelelwa, ezigwetshwe nguCourt Martial, ezilembali yokubaleka lalezo ezilamacala amakhulu agoqela ukubulala, ukuthengisa ilizwe, ukudlwengula, ukutshontsha imota, udlame, ukuba lombhobho lokwephula i-Electricity Act,
Postal and Telecommunications Act, Public Order and Security Act, Maintenance of Peace and Order Act leRailway Act and the Copper Act.
Ngomnyaka odluleyo uMongameli Mnangagwa wakhulula izibotshwa ezingu-4 000.
Online Reporter