UHulumende uqina ngohlelo lokufundisa ama-digital skills eMatabeleland South

Nkosilathi Sibanda

NJENGOBA ilanga lokuthakazelela uzibuse selisondele, uHulumende usebike ukuzimisela kwakhe ekufundiseni abasakhulayo eMatabeleland South, ngemisebenzi ephathelane lemitshina yakulezi insuku, ama-digital skills.

UHulumende, ngaphansi kogatsha lwe-Information Communication Technology, Postal and Courier Services, uqale uhlelo lwezifundo lezi ngenhloso yokuncedisa abatsha ukuthi bathole ulwazi oluzaphakamisa impilo zabo, kuncede njalo ekuthuthukisweni kwelizwe.

Abatsha abasesigabeni seGwanda laseManama, eMatabeland South, abaphezulu kwe-200, sebethole lezi izifundo.

“Lokhu kungaphansi kwenhlelo ezinengi zikaHulumende zokuphakamisa iMatabeleland South, nanko yiyo ezaphatha umkhosi wokuthakazelela uzibuse lonyaka.

“Uhlelo lolu lusekelwa yiDigital Truck, okuhloswe ngayo ukuvala isikhala sokusabalala kolwazi mayelana ngama-digital skills. Inhloso ngeyokunika abatsha ulwazi lomqondo wokuzithuthukisa,” kutsho ugatsha lwe-ICT kuHulumende kumbiko walo okhitshwe ebulenjini.

“Inyathelo leli litshengisa ukuzimisela kukaHulumende ekuthuthukiseni abatsha lokuqhubekisela phambili uhlelo lokuguqula ilizwe lihambisane lokumunyethwe kunhlelo ze-digital.”