Sidumisile Mabena
Nkosilathi Sibanda
UHULUMENDE uza yenza konke okusemandleni akhe ukuthi amaMighty Warriors athole lonke usekelo phambi kokuba ayemela ilizwe kumqhudelwano weCOSAFA Women’s Championship ozabe usedolobheni lePolokwane, eSouth Africa.
Lokhu kuvezwe nguMsekeli kaMphathintambo wogatsha lweSport, Recreation, Arts and Culture u-Emily Jesaya ngesikhathi evakatshele iqembu lelizwe enkambeni yalo yokulolonga ngoLwesine.
Umqhudelwano weCOSAFA Women’s Championship lo, uzaqala mhlaka 18 Nhlolanja kusiya kumhlaka 1 Mbimbitho.
UJesaya uthe ukuvakatsha kwakhe bekuhlose ukuyahlola amalungiselelo eqembu kunye lokutshengisa usekelo lukaHulumende kwabesifazane abaphatheka kwezemidlalo.
Uthe uHulumende ubefuna ukuzwisisa ngesimo seqembu lokuhlaziya lapho okuhlala khona abadlali.
“Sikubone kufanele ukuthi sixoxisane labadlali, sitshengise usekelo lokuzimisela kwethu ekuphumeleleni kwezemidlalo, ikakhulu abesifazane.
“Besifuna njalo ukuqondisisa indlela abahlala ngayo enkambeni, ukuthi badlani lokuthi basebenzisani,” kutsho uJesaya.
Uchaze ukuba uhlangane labadlali labaqeqetshi kwaba lokuzwisisana kundaba zenhlalakahle, amakontileka lokunye.
UMsekeli kaMphathintambo lo uthe bazadlulisela phambili zonke izikhalazo zabadlali kuHulumende lezinye ingatsha.
UJesaya ubehamba lomqondisi omkhulu kugatsha lwezemidlalo u-Eugenia Chidhakwa, umongameli weZimbabwe Football Association uNqobile Magwizi, umsekeli wakhe uLoveness Mukura ilunga lebhodi u-Alice Zeure losabambe isikhundla sikanobhala uNorman Gwangwadza.
Phambilini, umqeqetshi wamaMighty Warriors uSithethelelwe Sibanda wabikela iphephandaba likazulu ukuthi uzasebenzisa wonke amaqhinga okuthi abumbe iqembu elincintisela ukunqoba kumidlalo yeCosafa Women’s Championship.
Umqeqetshi lo kulindelwe ukuba akhethe iqula labadlali azahamba lalo ePolokwane, phakathi kwalabo alabo enkambeni yokulolonga.
Online Reporter