Bunjiwe Mkwananzi
Sikhumbuzo Moyo
UHULUMENDE usebike ukuba uzaqhubeka esekela izizalwane zakuleli ezivela eSouth Africa ngokubenzela inhlelo zokuziphilisa ukuze zenelise ukuqalisa impilo entsha.
UMphathintabo obona ngokwenzakala koBulawayo uJudith Ncube ukhulume lokhu ngoLwesithathu ngesikhathi esamukela elinye iqembu lalabo abavela eSouth Africa, ebandleni le-United Congregational Church of Southern Africa eNjube.
Iqembu leli lifike ngebhasi letshumi selokhu kwaqalwa uhlelo lokwamukela abantu abavela eSouth Africa.
UNcube, obehamba lamalunga e-Joint Operations Command, uthe uHulumende waphangisa ukuhlela ukwamukela abantu laba ngemva kokuzwa ngobunzima ababebhekane labo eSouth Africa.
“Siyalemukela ekhaya. Sithe sesizwe ngobunzima elalihlangana labo eSouth Africa lokuthi selibuyela ekhaya, sahlangana loMongameli Emmerson Mnangagwa saxoxa ngendlela esingancedisa ngayo abantu bethu,” kutsho uNcube.
Uthe uHulumende uzinikele ukubancedisa ngenhlelo zokuzithuthukisa ukuze baziphilise.
“Sizaletha inhlelo zokuzincedisa ukuze lenelise ukuziphilisa lapha ekhaya.”
UKhomuredi Ncube uphinde wancoma inhlanganiso yamabandla, i-Zimbabwe Heads of Christian Denominations, ngokuhlanganisa abalakho ukuze kuncediswe abavela kwamanye amazwe ngaphambi kokuthi baqhubeke baye emakhaya abo.
Uthe ukusebenza ndawonye kukaHulumende, amabandla ezokholo kanye lenhlanganiso ezizimeleyo kuzaqhubeka ukuze kube leqiniso lokuthi ababuyayo bathola indawo yokulala, ukudla, ukwelulekwa ngokwengqondo lolunye uncedo oludingakalayo.
Online Reporter