Online Reporter
YiNtatheli kaMthunywa
UMGCINISIHLALO weHighlanders uKenneth Mhlophe usethule amazwi enduduzo kulandela ukwedlula emhlabeni kukaBabongile Sikhonjwa.
USikhonjwa, ubeleminyaka engu-49 yokuzalwa. Ubengusaziwayo kwezokusakaza, ukuhlekisa lokulingisa. Phezulu kwalokhu, umuyi ubengumlandeli weqembu lenguqu iHighlanders.
Ngomnyaka ka2022 uSikhonjwa wancintisa kukhetho lukamsekeli kamgcinisihlalo weHighlanders kodwa wanqotshwa.
UMhlophe uthe uSikhonjwa ubengumsekeli woqobo.
“Uthando lwakhe ngeqembu leHighlanders lwabonakala. Ubezimisele ukuhamba leqembu. Silahlekelwe.
“Sizamkhumbula ngemisebenzi yakhe emihle. Ngaso sonke isikhathi ubelandelela esikwenzayo. Abe lemibuzo, aphinde ethule amacebo lezixwayiso kubakhokheli, abalandeli labadlali bethu. Inengi limazi njengomuntu owayethanda ukuhlekisa kodwa kuHighlanders ubesenza okunengi,” kutsho uMhlophe.
