admin
KULOKHANSILA welizweni le-India oleminyaka yokuzalwa engu-35 osekuvele ukuthi utshade lomntwana oleminyaka eyisithupha kwelinye ibandla elisesiqintini seGangrar.
URatan Lal Jat ulilunga elavotelwayo kukhansili yeGangrar, eRajasthan, eWest India.
Kuzwakale ukuthi uJamuni Bai owazakala ngokutshadisa abantu abenza ukuganga lokhu nguye obatshadisileyo njalo uyabhadalisa ukwenza lokhu.
Amapholisa aveze ukuthi umtshado kaRatan Lal Jat ubuhlose ukugcwalisa izifungo zikaNata Pratha.
Elinye isiko leNata Pratha lithi indoda ethetheyo ingaba lobudlelwano lowesifazana owendileyo nxa esenelisa ukumbhadala njalo kuyabe kukhangelelwe ukuthi ababili laba batshade.
Ngenxa yokuthi uRatan Lal Jat ubengathathanga, utshade lomntwana lo oleminyaka eyisithupha ukuze alandele isiko leli.
Abakibo komntwana lo kuzwakale ukuthi babhadelwe ukuze umtshado lo wenziwe. Kubikwa umntwana lo ulakho ukuqhubeka ehlala ngakibo.
Amapholisa asebophe uRatan Lal Jat ngokwephula umthetho owenqabela imitshado labantwana owabekwa ngomnyaka ka2006.
UInspector Gyanendra Singh, ongumqondisi wenkamba yeGangrar, uthe: “Indaba le siyazi ngemva kokubona izithombe zomtshado ebulenjini. Sesibone imifanekiso le sathuma iqula labacuphi layadingisisa ngendaba le.
“Sathola ukuthi uRatan Lal utshade lomntwana ukuze alandele imikhuba yakudala. Kithi lapha sibona umuntu owephule icala ngokuthatha umntwana omncene kungakho simbophile.”
UJamuni Bai yena ulokhe esadingwa ngamapholisa ngokutshadisa laba njalo amapholisa adinga lalabo ababekhona
Online Reporter