Online Reporter
Nkosilathi Sibanda
NJENGOMZAMO wokuphakamisa umphakathi, ikakhulukazi abasakhulayo emadolobheni, uKhansila weNketa uTavengwa Zidya usexwayise ukuthi intsha ikhuthalele ukusungula amaphurojekithi, amabhizimusi alakho ukuguqula impilo zabo, asukumise umkhonomi welizwe.
Ekhuluma lephephandaba likaMthunywa ngoLwesibili, uZidya ugcizelele ukuqakatheka kokuthuthukisa abasakhulayo ukuze bathole imali ngenhlelo ezitshiyeneyo zomnotho.
“Ukusungula amabhizimusi yikusasa lomnotho wethu lapho esihlala khona, edolobheni laselizweni jikelele,” kutsho uMnu Zidya.
“Ngokusekela lokukhuthaza abantu abatsha ukuthi bazisungulele amabhizimusi abo, singakha amathuba omsebenzi, siqhubekisele phambili ngokusungula izinto ezintsha, sibe lesandla ekuthuthukisweni komnotho welizwe. Ikhona njalo minengi imisebenzi engasungulwa nxa silentsha-ke ezimiseleyo, ekhutheleyo. Kulamaphurojekithi emitshina yokuxhumana yakulezinsuku enjengama Application ento ezitshiyeneyo. I-technology iyakuvumela lokhu njalo yikho lapho intsha edinga ukuthi ikhuthazwe.”
Inkuthazo le ngiyibeka kanje ngoba iza ngesikhathi loHulumende esenanzelele ukuqakatheka kwabosomabhizimusi ekuxazululeni inkinga zomnotho welizwe. Njengoba ingxenye enkulu yentsha ithwele nzima ukuthola imisebenzi, ukusungula amabhizimusi kunganikeza isixazululo esithembisayo kwezomnotho.”
UZidya uveze ukuqakatheka kwemisebenzi yezandla.
“Sidinga ukuthuthukisa intsha yethu ukuthi ikwazi ukulawula impilo zayo ngenhlelo zokuzisiza, okubalisela imisebenzi yezandla. Ngokwenza lokho, ingathola imali, idale amathuba emisebenzi, kuphakame imuli.”
UMnu Zidya usenelise ukubambana lezakhamizi ngokuvuselela izivande ezilezibholane ezisebenzisa amandla e-solar ukudonsa amanzi. Izivande lezi seziziphathise kakhulu ngoba izakhamizi sezithengisa izilimo zithole imali yokuziphilisa. Izivande zokudla okulomsoco ziyindlela yokuthi intsha iqale ukukhulisa amabhizimusi ayo. Kasisebenzeni sonke, sakhe ilizwe lethu.”
