Online Reporter
Zimpapers Sports Hub
INHLANGANISO yeFifa yesule isijeziso seqembu leHighlanders ngoLwesibili, osekuvuselele amalungiselelo kaKelvin Kaindu okuqinisa iqembu ngabadlali abatsha.
Isijeziso lesi sethulwa ngemva kokuba iBosso yehluleke ukubhadala umqeqetshi uBaltemar Brito lomsekeli wakhe u- Antonio Joao Torres i-US$27 000.
Bathabe babamanzi te emahofisini eqembu leli ngoba inkokheli lomqeqetshi sebelethuba lokuthi babize abadlali abazafika baqinise iqembu kumkhankaso wenkezo yeCastle Lager kulisizini.
NgoLwesibili ntambama, iBosso yethule injabulo yayo ngokwesulwa kwesijeziso.
“Ukulinda sekuphelile! Siyajabula ukulazisa ukuthi isigwebo seFifa sesisusiwe. Sibonga imizamo yequla leFifa ukuthi konke kuxazululiwe.
“Siphinde sibonge lo-Sir Wicknell Chivayo ekubhadaleni isikwelede. Njengoba sesikwenzile lokhu, sesingathola abadlali abatsha abalakho ukuba seqenjini sidlala leGreenfuel. Ukhon’ ozokhala!” kubika iHighlanders.
Kubadlali abakhangelelwe ukubizwa nguKaindu, kulomgadli uNever Rauzhi obekuBulawayo Chiefs, Tendai Muvuti obedlalela iHwange FC. Kubizwe njalo lomdlali wesiswini uHubert Ncube osuke kuZPC Hwange loPanashe Mushonga obetshibilikela iChegutu Pirates.
Kulomunye umgadli uMbonisi Ncube ovela kuqembu le-BDF XI eBotswana.
Kusenjalo, iyaqhubeka imidlalo ye-Castle Lager Premier Soccer League kusukela ngoLwesihlanu, kungenwa kuviki yesithathu lapho okuzaqala ngomdlalo phakathi kwe-Scottland leNgezi Platinum Stars, enkundleni yeRufaro.
Kumdlalo odluleyo, iScottland yanqoba iCAPS United 2-0. Iqembu leli, eliqeqetshwa nguTonderai Ndiraya yilo lodwa elingakanqotshwa.
INgezi Platinum yanqoba iGreenfuel 1-0, ihlohlelwe nguMalvin Gaki. NgoMgqibelo, iHighlanders isemangweni ilande iGreenfuel, eGreenfuel Arena. IBosso ingena kulumdlalo izitshaya isifuba kulandela ukubhuqa iKwekwe United 4-0 eBarbourfields.
Iqembu likaJoey Antipas iChicken Inn lemukela iFC Platinum eLuveve. Ngempelaviki edluleyo, iFC Platinum yanqoba iManica Diamonds 1-0, eMandava.
IDynamos izabe isekhaya, eRufaro leTelOne, kuthi intshantshu iSimba Bhora zizadlala leHerentals enkundleni yeWadzanayi. Abafana abachinsa iPSL iMWOS ile Yadah Stars, eBaobab.
IKwekwe United inxuse iBikita Minerals, eBata Stadium eGweru.
Imidlalo yePSL ngeviki lesithathu:
NgoLwesihlanu
Scottland FC v Ngezi Platinum Stars (Rufaro)
NgoMgqibelo
Simba Bhora v Herentals (Wadzanayi), Dynamos v Telone (Rufaro), Chicken Inn v FC Platinum (Luveve), MWOS v Yadah (Baobab), Greenfuel v Highlanders (Greenfuel Arena), Kwekwe United v Bikita Minerals (Bata)
NgeSonto
Manica Diamonds v ZPC Kariba (Sakubva), Triangle United v CAPS United (Greenfuel).
