Online Reporter
ZiNtatheli zikaMthunywa
KUDABA oluhlasimulisa umzimba kulenina leBeitbridge elixhonxe umkalo kanengi ngengqamu lamtshiya elimele kakubi ladliwa ngumswenya kuviki ephelileyo.
UNdumiso Dube, oleminyaka yokuzalwa engu-41 ugwazwe ngumkakhe uNkosikazi Shorai Dube oleminyaka yokuzalwa engu-38 elele njalo isizatho sesenzo sakhe asikaveli.
Kubikwa ukuba uNdumiso Dube wayelele ngesikhathi umkakhe emgwaza ngengqamu, wamtshiya elimele wabaleka njalo akwaziwa ukuthi wangena kuwuphi umlindi. Umamangala wahlaba umkhosi kodwa akulamuntu owamzwayo ngesikhathi leso.
Umnikazi wendlu lapho abahlala khona nguye owatshayela ucingo abe-ambulensi yagijimisela uDube esibhedlela seBeitbridge lapho alokhu elaliswe khona.
Obambele isikhulumi samapholisa eMatabeleland South u-Inspector Stanford Mguni ubike ukuba indaba enjalo yenzakala.
“Sichwayisisa ngodaba lwenina elagwaza umkalo uNdumiso Dube elele. Sikhuthaza abathetheneyo ukuthi bangaba lohlupho kabazame ukukhulumisana kuhle kulokusebenzisa udlame.
“Umuntu nxa ebhekane lobunzima emzini wakhe kabikele izihlobo eziseduze, obabakazi, izinkokheli zomdabu lamapholisa ukuze zimncedise ukuxazulula udaba kulokulwa,” kuphetha uInsp Mguni.
