Online Reporter
Zimpapers Sports Hub
UNGAZE usuke uyengaphi, ekhaya kumnandi!
Lokhu yikho okwehlele usaziwayo kwezokuxhumanisa abalandeli benguqu, uThulani “Javas” Sibanda, owasuka kuBulawayo Chiefs esiyakuScottland.
Khathesi usephendukile kuBulawayo Chiefs, esengumaqhuzu omutsha. USibanda ungene eqenjini labafana abachinsa ukudlala ku-Premier League, iScottland engu-Digital Media Officer.
IBulawayo Chiefs idlala kuligi yeZifa Division One, kumhlubulo ongezansi yelizwe.
Ukuphenduka kwakhe kuMakhosi Amahle, kubikwe liqembu kumbiko othunyelwe ngoLwesithathu emini.
“Iqembu leBulawayo Chiefs Football Club liyathokoza ukwazisa ngokubuya kukaThulani Javas Sibanda, osengumaqhuzu weqembu. UThulani ngumuntu ozinikeleyo njalo uke wasebenza engu-media officer wethu kusukela ngo-2018, ngesikhathi iqembu likhutshulelwa ku-Premier League. Umsebenzi wakhe wenza kwabalula ukuphakamisa isisindo seqembu lethu lokusixhumanisa labalandeli.
“Ngemva kokusebenza okwesikhathi esifitshane leScottland FC, ukhethe ukuthi aphenduke kuBulawayo Chiefs. Ukuzwisisa kwakhe i-digital media kumbeke endaweni efaneleyo njalo silokukholwa ukuthi uzakwenza ngcono eqenjini. Kusikhundla sakhe esitsha, uSibanda uzahlosa ukuthi abeke amacebo lamaqhinga amatsha azakwakha iBulawayo Chiefs, ukuze ibalelwe kumaqembu amakhulu kuleli,” kubika iBulawayo Chiefs.
USibanda, ebika ngomsebenzi wakhe omutsha uthe: “Ngizizwa ngihloniphekile ngokukhethwa njengomphathi omkhulu weBulawayo Chiefs. Ukubuyela kuleli iqembu kutsho okunengi kimi. Igazi lami lilombala weBulawayo Chiefs. Ngizimisele ukuletha ingqubekela phambili hatshi kuBulawayo Chiefs kuphela kodwa kulumhlubulo welizwe.
“Ngikholelwa emandleni alithimu kunye lethalenta elikhona kunguqu yomhlubulo ongezansi yelizwe. Inhloso yami ngeyokwenza iBulawayo Chiefs ibe liqembu elikhokhelwa kakuhle, elithokozisa umoya wabalandeli bayo lomphakathi wenguqu. Ngokubambisana sizakwakha ikusasa elihle kuBulawayo Chiefs,” nguJavas lo.
