Online Reporter
NGAXOXELWA udatshana oluhlasimulisa umzimba, kutshwaqe igazi, iminwe ibanjwe yinkantsho ngumngane wami uDingindawo, uthi yena babezelwe beyisikhombisa; amantombazana amathathu lamadodana amane, yena elizibulo.
Bondliwa kogogo wabo ozala unina nanko phela unina wayengumhambuma ebhoda lezinkomponi. Wayethi angazithwala abuye atshiyele unina umntwana athi uzabethuma.
Wayengathumeli lutho, mhlawumbe ezitshela ukuthi khonale ekhaya sebethole abafana benkomo.
Oyise babantwana laba babehlukene ngokunjalo babesebenzisa isibongo sakomalume. Lekuthathisweni incwadi zokuzalwa unina wayengekho esekujabuleni khonale emigodini.
Bakhula bengamazi unina baze baba zinkalakatha zamajaha lezintombi basebekholelwa ukuthi mhlawumbe sewafa ngoba akukho loyedwa umuntu owayesazi lapho akhona njalo loyake athi ngimbone endaweni ethize.
Bakhula impilo yobuntandane kodwa bengasintandane. Umalumabo owayeyinsumbelume wayesethole izigqili zakhe ebaqhatshisa ebantwini abenguye ohola imali yakhona, lapho bezama ukumbonisa ukuthi labo kukhona abafuna ukukuthenga wayebhavuka akhwaze abathuke ababize ngelokuthi bangamagola, into ezingazi oyise.
UDingindawo watshiya lapho ayesebenza khona waya eGoli wafika wathola umsebenzi omuhle owawumnika iholo eliphezulu wakhela abanewabo imizi labodadewabo.
Ugogo wakhe waphucula umuzi wakhe wafaka impompi zamanzi lamagetsi kwaba sesikhiweni.
Umalumakhe owayebahlukuluza kazange ambophele umoya kodwa wamthengela umdududu, wayengasabizwa ngokuthi ligola, sebizwa ngelithi mntaka-dadewethu.
Ngelinye ilanga belibele behleli emthunzini logogo wabo babona kuthutsha isalukazi sithwele umgodla owawungcole usesabeka okwehovolosi kamakanika akade eqethukile elungisa ibhasi.
Bacabanga ukuthi mhlawumbe yisigulane sengqondo esifohle esibhedlela senhlanya.
Wathi efika eduze wezwakala ugogo wabo ethi mntanami Duduzile ubudliwe yiziphi izindunduma.
UDingindawo wahle wayifunda ivaliwe ukuthi ngunina wathi lapho efuna ukumthonisisa ukuthi aze ahambe iminyaka yonke le engelandaba labo wezwakala ugogo ethi mayuyu bo umzali ngumzali.
Ayixabene.
