Online Reporter
Iqoqo: Umdumo wezinkondlo olwalotshwa ngu N.S Sigogo labanye
Inkondlo: UMagwebu eyalotshwa ngu E J Ndlovu
Ophezulu Stinta
Sikhangela ukusetshenziswa kolimi kule nkondlo.
Imbongi yandise ukweqiwa kwabonkamisa enkondlweni le, isibonelo kusiqendu esithi:
Wen’ uyakubone amanqe
Eland’ nyamazan’ fileyo
Kamb’ atshelana nini ngayo
Sinanzelela ukuthi ukweqiwa kwabonkamisa lokhu kudala ubungoma enkondlweni. Nxa sekulobungoma kanje oyifundayo uyajuluka lenkondlo ayikhwabithe imqumba qumbe nxa kungamazwi aqumba qumbayo, ivuse usizi njalo nxa kungamazwi avusa usizi.
Ukweqiwa kwabonkamisa kudala umehluko kumbhalo wenkondlo kumbhalo olandisayo, lokhu singathi luphawu lwenkondlo.
Umfanekiso
Ngokunikeza utshwala amandla entombi emhlophe nke kanye lesimilo sentombi le. Imbongi idala umfanekiso esiwubonayo enqondweni zethu.
Kufika umfanekiso wentombi elamandla, ebumbekileyo njalo ethutsha kuphambane amadoda wonke esiyazilahla phezu kwayo intombi le.
Kuba lomfanekiso wabantu abakhatheleyo kodwa bengabonakali besiya phumula emakhaya abo bavele baqonde khona kule intombi emhlophe bafike bazilahle phezu kwayo kudaleke umfanekiso wentombi ebamukela ngezandla ezivulekiyo sengathi Ibiza bonke abalenhlupho zayo labakhatheleyo ukuthi bazothola uphumula kuyo.
Izifundo
Ekubaleni inkondlo kumele sifunde okuthile. Njalo kuyinjongo yembongi ukuthi abafunda inkondlo basale befunde okuthile ngempilo. Umbhalo wenkondlo lo ubuya uyisibuko sempilo, ufundisa uxwayisa njalo ngezinto ezehlukeneyo.
Ububi botshwala
Loba abanengi enkondlweni le bebona utshwala buqeda inhlupho kanye lokukhathala emphefumulweni yabo, abanengi bafile, babunatha badlulise amalawulo, kuvuke ingxabano lezimpi kufikesigabeni sokubulalana. Kukanti abanye njalo behlelwa zingozi abehluleka ukuzenqabela ngenxa yesimo sokunatha utshwala.
Imizi eminengi isihambe yadilika ngenxa yotshwala loba kambe nxa abantu sebedilikelwa yimizi kuyini okuhle okungabaliswa ngotshwala lobu. Obaba kabasakhangeli abantwana babo, bakhetha lokudlula ngaphandle kwemizi yabo beqonda etshwaleni, ukuthi abantwana balala bedleni akukho kibo njalo akukho lasemicabangweni yabo lokho.
Utshwala sebukhulisa imizi egcwele izintandane, pho ingaphi ikusasa yabantwana nxa abazali babo sebethunjwe butshwala ngendlela efana lale esiyethulelwa yimbongi. Abanye bayizigoga abanye babolela emajele ngenxa yotshwala lobu.
