Online Reporter
Brandon Moyo
AKUZINGA eliphezulu amalungiselelo omncintiswano omkhulu wamazwe adlala ikhilikithi, owe-ICC U19 Men’s World Cup 2026, nanko sekwethulwe inkezo le ezancintiselwa kuleli laseNambia.
Ukulungiselela lokuzimisela kwelizwe ukuphatha imidlalo le kuvezwe nguMphathintambo wezemidlalo kuHulumende u-Anslem Sanyatwe ngesikhathi kutshengiswa linkezo eHarare.
Imidlalo izaqalisa mhlaka 15 Zibandlela kusiya ku 6 Nhlolanja njalo kuzadlala amazwe angu-16, kugoqela leTanzania ezabe ichinsa ukufika kunkundla eziphezulu emdlalweni lo.
Inhlanganiso yeZimbabwe Cricket, ndawonye leye-ICC, zikhethe uTatenda Taibu ukuthi abengumhlonitshwa wemidlalo, ngenhloso yokuthi akhuthaze abasakhulayo nanko laye wazakhela udumo edlala ama-Under 19 akuleli.
UTaibu wake waba ngukaputeni wama-Chevrons.
Umbiko kaSanyatwe wethulwe ngosaphethe isikhundla sikanobhala wogatsha lwezemidlalo, uCynthia Mawena.
“Lo ayisiwo umncintiswano wekhilikithi nje, kodwa uyinkundla yokujabulela ithalenta elisakhulayo emdlalweni,” kutsho uSanyatwe.
“IZimbabwe leNamibia, amazwe azaphatha imidlalo le, azakhunjulwa okweminyaka eminengi ezayo ngokubisa imidlalo e-Africa. Umncintiswano uzakuba yinkuthazo kubadlali abasacathula, uphinde uqinise inhlelo zokukhulisa umdlalo.”
Umsekeli kamgcinisihlalo weZimbabwe Cricket uSylvester Matshaka wethule isibongo kunhlanganiso ye-ICC ngokunikeza ilizwe lelithuba.
“Ukuphatha imidlalo le ndawonye leNamibia kungumlandu omkhulu, esiwamukelayo ngazo zonke izandla. Inkezo yama-Under 19 le iphakamisa abadlali bakusasa njalo yikho lapho abazethula khona ebantwini.”
Umqondisi walumncintiswano kuleli uHamilton Masakadza uthe inkundla ziphakathi kokulungiswa, eQueens Sport Club koBulawayo, Harare Sports Club laseTakashinga.
“Imidlalo yonke izabukelwa mahala. Sifuna wonke umuntu angene, agcwalise inkundla akholise umdlalo,” kutsho uMasakadza.
Kusenjalo, inkezo ye-ICC U19 izabhodiswa koBulawayo, eMasvingo laseHarare kusukela mhlaka 4 kusiya ku7 Zibandlela.
