Gilbert Munetsi
UNOMPEMBE obuya abengumahluli kumdlalo wenqindi, uSteven Masiyambumbi, uphiwe isicoco esiphezulu ebongwa ngomsebenzi omuhle awenzileyo lonyaka.
UMasiyambumbi uhlonitshwe phakathi kwengcitshi zomdlalo ebezithe gwaqa ku-International Boxing Association (IBA) Men’s World Championships oqhutshelwe eDubai, e-United Arab Emirates ngeviki edluleyo.
Kube lokuthula okwesikhatshana kulumkhosi, sekulindwe isimemezelo sokuthi nguphi othole isicoco seBest Championship Referee le-Judge Award. Kube yinjabulo kuleli kubizwa ibizo likaMasiyambumbi.
UMasiyambumbi udabuka edolobheni lakoBulawayo, okuyilapho asungula khona uthando lwakhe lomdlalo we-boxing.
Umanqoba lo waqala esilwa kubanga le-welterweight division uthe etshiya wasesiba ngumahluli lonompembe.
AbeZimbabwe Amateur Boxing Association bamqhatsha njengoTechnical Director, okwenza wathola amathuba okuhamba, lokubamba imidlalo etshiyeneyo kumabanga athile agoqela ama-African Championships, All-Africa Games lama-World Championships.
Ngokuqansa kwakhe kumsebenzi lo wacina ephiwa isicoco se-IBA Top Three-Star Certification. Lokhu sekumenze waba ngumuntu obizwa kumidlalo eminengi.
Imincintiswano enjengama-World Championships sokuyimvama ukubana abizwe.
Ama-IBA Men’s World Championships yiyo imidlalo emikhulu yezenqindi njalo yenziwa ngemva kweminyaka emibili.
Ngokwala ekhwela uMasiyambumbi unikeza ithemba lokuthi angaphiwa ithuba lokuthi abengomunye wabazaphatha ama-Olympics.
AmaOlympics yimidlalo emikhulu kulayo yonke umhlaba jikelele.
