Online Reporter
Bhekimpilo Tshalibe
INGCITSHI kwezokufuya sezixwayise abalimi abagcina ingulube ngokudla okumele bakuphe ingulube zabo okungakhulisa izibaya zabo masinya.
UNkosazana Sandra Ndlovu ongu-Agricultural Extension Officer koBulawayo usekhuthaze abalimi abagcina ingulube ngokudla okumele bakunike ingulube zabo. Uthe umlimi kumele abekwazi ukuthi ingulube zidla ukudla okulama nutrients anganani.
“Ingulube kumele idle ukudla okulama protein ayi 12 kusiya ku-22%, energy eyi 3 200-3 800 kcal/kg, fibre eyi 2-5%, fats ayi 2-5%, calcium eyi 0.8-1.2%, i-phosphorus eyi 0,6-1,0%, Vitamin A ayi 1000-2000 iu/kg kanye lo Vitamin E 20-40 iu/kg,” kutsho uNkszn Ndlovu.
Uqhubekele phambili esithi kulemihlobo yokudla kwengulube egoqela ukudla okulama protein, ama-grain based kanye lokunye okokungezelela.
“Ukudla okumele kuphiwe ingulube okulama-protein kugoqela indumba, inhlanzi kanye lamathambo, ukudla okulezilimo ezibalisa ingqoloyi, amabele lenyawuthi.
“Okunye ukudla okunganikwa ingulube yimbhida esibolile, izithelo esezibolile kanye lotshwala osobonakele,” kutsho uNkszn Ndlovu.
Uthe ukufidwa kwengulube kuyatshiyana kusiya ngokuthi ingulube zileminyaka emingaki kanye lesisindo sayo.
“Ukufidwa kwengulube kuyatshiyana kusiya ngokuthi zinganani, ezile 0 kusiya ku-4 weeks kumele ziphiwe ukudla okuphakathi kwe 0,2 kusiya 0,4kg ngelanga okulama protein ayi-18-20% kanye le energy eyi 3,200-3,500kcal/kg.
“Sekuzaba lama grower pigs (4-12 weeks) kumele aphiwe ukudla okuyi 0.5 kusiya ku-1,5kg okulama protein ayi-16-18% kanye le energy eyi 3 300-3 600kcal/kg.
“Ama-finisher pigs ngezilamaviki ayi-12 kusiyaphezulu ezidinga ukudla okuphakathi kwe 1,5 kusiya ku-2,5kg okulama protein ayi 14-16% le energy eyi 3 200-3 400kcal/kg. Kuthi lezo ezizeleyo kumele ziphiwe ukudla okuyi 2-3kg ngelanga,” kuphetha uNkszn Ndlovu.
