admin
Ncekwenhle Ncube
ABAFUNDI beSizinda Vocational Training Centre akade bephiwa izicoco ngoLwesine kuviki ephelileyo baphinde njalo bakhuthazwa ukuthi bakhaliphe njalo bangahlaleli izandla kodwa bazisungulele awabo amabhizimusi azenza kube lemisebenzi.
Inkuthazo le bayinikwe nguMphathintambo wogatsha lweYouth Indigenisation and Economic Empowerment uKhomuredi Patrick Zhuwao njalo obengumhlonitshwa kumkhosi wokuqeqetsha kwabafundi ekolitshini le yemisebenzi yezandla etshiyeneyo.
Kumkhosi lo abafundi abangu-209 baphiwe izicoco zokufundela imisebenzi etshiyeneyo yezandla egoqela iHotel and Catering, Motor Mechanism, Boiler making, Tourism and Travel lePlumbing kanye leminye imisebenzi ehlukeneyo.
Phakathi kwabafundi laba abaqeqetshileyo bekulamantombazana angu-102.
UMphathintambo Zhuwao ukhuthaze abatsha bonke abenza imisebenzi yezandla ukuthi ngemva kokuphiwa izicoco kumele basukumele phezulu bevuselele ilizwe kwezomnotho.
Uthe abatsha bakhuthazwa ukuthi bafundele imisebenzi yezandla ukuze benelise ukuthola amathuba okuziqhatsha.
Kubikwa ngokunanzelela lokho ugatsha lwabatsha lwakhuthaza ukusungulwa kweZimbabwe Youth Empowerment Strategy for Investment ebona ngokusungulwa kwamathuba okuthi abantu bazisebenze. Lokho kuzenza abantu abatsha benelise ukuziqhatsha bodwa.
Lokhu kungenxa yokuthi abatsha balomlandu wokuvuselela umnotho kuleli.
“Ukuswelakala kwemisebenzi yinkinga enkulu ebhekane labatsha. Nxa sikhangele ukubalwa kwabantu ngomnyaka ka2012 kulabantu abatsha abafika 36% elizweni lonke nje jikelele.
“Abatsha laba baphakathi kweminyaka engu-15 kusiya ku-34. Phakathi kwabo abafika i84% abaqhatshwanga,” kuchaza uKhmrd Zhuwao.
Uthe bakhuthaza kakhulu abatsha abangazuzanga ithuba lokuya esikolo ukuthi baye ezikolo ezifana lalezi ukuze bafundiswe imisebenzi yezandla ngoba ilakho ukubaphilisa.
Umhlonitshwa ubuye wabonga izakhamizi zeSizinda ngokuncedisa intsha le ukuze yenelise ukuqeqetshwa emisebenzini yezandla. Lokhu uthe kuzanceda ukulwisa ukusetshenziswa kwezidakamizwa kanye lobugebengu ngoba abantu abatsha bezabe bephathekile emisebenzini yabo.
Online Reporter