adminCharles Dube
LAMHLANJE sihlangana lejaha eliqinisa isithandwa salo ukuba singaze sethuka sicabange ukuthi singatshiywa nje egcekeni. Asikuthandandabuzi ukuthi ijaha leli kungaba yimbongi yona ngokwayo ekhuluma lapha. Imbongi itshela isithandwa sayo ukuba kasijabule sithokoze, siqolotshe njengenkonyane ibona unina evela chaka etshengisa ukuba wehlisile isizamunya isuthe. Ngokufanayo imbongi ithi isithandwa sayo kasijabule seqe size siyebamba amayezi, igazi laso lijuluke umthabo.
Ngokwazi kwethu akulamuntu ongeqa aze abambe amayezi kodwa imbongi isebenzise ihaba ikhuthaza isithandwa sayo kasijabule kakhulu seqe kakhulu ngokuthaba ngoba sikhethwe yinhliziyo yakhe. Kumele sijabule kakhulu isithandwa sembongi lesi ngoba ibacezile omehlomehlo, laba abathanda isilisa. Bebemcijisela amehlo lapho beyibona imbongi bethi kayikhethe bona kodwa yona ihambele khatshana njemuntu olimayo eceza ithuna elisendimeni yakhe. Lokhu kutsho ukuthi imbongi kayibathakazelelanga omehlomehlo labo.
Ikubeka sobala imbongi ukuthi ibekele omhlambi kazelusile isitsho intombi ezingaziphathanga yalanda sona isithandwa sayo asibiza ethi yintombi elokuthula. Uthi ulande sona isithandwa sakhe esiyintombi engasihlongandlebe esitsho ukuba isithandwa sakhe sitshiyene lalabo abangalambeko, abangahloniphiyo. Ulande sona isithandwa sakhe esiziphetheyo esingelasikhombekhombe njengamahlongandlebe labomehlomehlo ebaqambe ngaphambilini.
Isithandwa sembongi siziphethe ngoba nanku ithi ilande sona esingasibele lendlela. Amabele endlela yilezo ntombi eziziphethe kubi ezilamajaha amanengi ngoba ziqoma wonke amajaha athe atshengisa ukuzithanda. Imbongi ithi zinengi intombi ezinhle njengesithandwa sayo kodwa izicezile zonke lezo waqonda khonale ezizweni. “Zitheliwe kulumhlab’ezinhle njengawe kodwa mina ngizicezile lezo ngaqonda khonal’ezizweni.”
Ngokuthi iqonde khonale ezizweni imbongi itshengisa ukuthi isithandwa sayo kasiveli eduze kodwa isilande kude lapho esingaziwa khona ngabeduze. Ithi ihambe yayasidinga khonale ezizweni sona isithandwa sayo esingathi sigeza ngochago esitsho ukuthi sincwaba siyabukeka. Iyagcizelela imbongi kusithandwa sayo ukuba isikhethile njalo kabawakhe owabo umuzi olokuthula. Ngesifiso sembongi umuzi wabo awube lokuthula lenhlonipho. Kawube lenhlonipho umuzi wabo ize ibuzwe kubo babeyisibonelo esihle ebantwini.
Online Reporter