Online Reporter
Siphathokuhle Ngulube
Salibonani bafundi. Ngithemba liqhuba kuhle ezifundweni zenu. Sizaqhubeka sihluza ubuciko obusetshenziswe kunkondlo yethu ethi Nkomo qhawe lethu.
Sikhangele izinto ezinengi eziyibuciko kule inkondlo emavikini adlulileyo engithemba liyabulandela kuhle lobu buciko. Imbongi ibuye yasebenzisa ubuciko bokuqamba amadolobho atshiyeneyo amazwe atshiyeneyo enkondlweni lapho esithi,
Mdala usikhomandile eMoscow
Nkomo sikulandel’ eLusaka
Mafukufuku usiholile eGeneva
Amagama abhalwe ngokugqamileyo ngamabizo ezindawo ezehlukeneyo. Ukuqanjwa kwalezi izindawo kuveza ukuthi ukulwa kukaNkomo akuzange kuphelele eZimbabwe kuphela kodwa wasabalala wahamba lemazweni atshiyeneyo etshengisa ubungcitshi bakhe kwezempi.
Lokhu kuveza ubuqhawe bakhe obumangalisayo. Asikunanzeleleni bafundi ukuthi ukuqanjwa kwezindawo ezithile embhalweni kungabo kulomutsho othile. Imbongi iqamba lezo zindawo ngezizatho ezithile.
Umlobi ubuye waqamba amabizo abakhokheli bamanye amazwe
UKaunda ubengakuthontisi
Kanti uMadiba belilibhanti lebhulugwe
Amagama abhalwe ngokugqamileyo ngamabizo abakhokheli bamanye amazwe. Lokhu kuveza ukuthi uNkomo ubelobudlelwana labakhokheli bamanye amazwe.
Kukhanya abakhokheli laba bebemthanda okwedlulisileyo ngoba bencoma ubuciko bakhe kwezempi. Umlobi ubuye wasebenzisa ibala elisisindo lapho esithi,
UKaunda ubengakuthontisi
Ukungathontisi umuntu yikumthanda kakhulu. Lokhu kuveza ukuthi ubuciko bakhe kwezempi bekusenza ukuthi abelobudlelwano obuhle labantu. Umlobi ubuye wasebenzisa isitsho esithi,
Kanti loMadiba belilibhanti lebhulugwe
Nxa kuthiwa abantu kuthiwa libhanti lebhulugwe kutshiwo khona ukuthi abantu abatshiyani njalo abehlukani behlanganiswa yizo ezombuso. Ibuye yasebenzisa ihaba lapho isithi,
Uzulu ubusekhwapheni lakhe
Osekhwapheni ngothandwayo ongathontiswayo. Uzulu otshiwoyo lapha ngabantu. Lona ibala elithi uzulu lilesisindo. Ligoqela nje wonke umuntu.
Ibala leli likhethwe ngobunono ukuze likhombe ukuthi wonke umuntu ubemthanda uNkomo. Ihaba lalo ligcizelela khona ukuthi uNkomo ubethandwa ngabantu bonke. Imbongi ibuye yasebenzisa ihaba lapho isithi,
Ngithand’ ehlabana loSmith emaBhunwini
Lapha imbongi ibisivezela indlela alwa ngayo loSmith lamasotsha kaSmith. Kuyakhanya ukuthi walwa ngokuzimisela wanqoba lanxa amabhunu ayesesabeka.
Ubuye wasebenzisa ibala elilesisindo lapho esithi,
Ngimncoma ehaqazana lezitha eJZ
Ibala Haqaza lilesisindo. Ukuhaqazwa kubuhlungu kakhulu. Ake sithathe nxa uhaqazwe yisibungwana esiluhlaza esithiwa ngumahaqaza. Lesi sibungwana singakuhaqaza utshona ulunywa ilanga lonke njalo usenwaya. Sekungenzeka ubemaqubu njalo.
Ngalokho ke kuyavela ukuthi wenza izimanga eJ.Z. Kungenzeka abanye bafa abanye balimala.
Elinye njalo ibala elilesisindo ngelithi eqothulana
Ngimbona eqothulana labafo eMkushi
Ibala eqothulana liveza ukulwa ngendlela ephakemeyo. Laye ke wahlabela kwangasali lutho kwafa amabutho.
Iyaqhubeka imbongi incoma ukulwa kukaNkomo kusifa abantu lapho esithi,
Wagongoda ibhunu kwazond’ uVosta eZanzi
Ukugongoda yikutshaya ngamandla wonke kufe ofayo. Kuyavela ke ukuthi banengi abafayo ngesikhathi sempi kubusa uNkomo.
Ubuciko obubaliswe ngaphezulu bonke buveza ubuqhawe bukaNkomo kanye lendlela alwa ngayo impi ngokuzikhandla njalo etshengisa ubuciko obukhulu. Imbongi imchaze kuhle kakhulu uNkomo.
Ngithemba sizinanzelele izinto esizidobhayo nxa sihluza ubuciko bembongi. Dinga ugwalo oluseduze kwakho olwenkondlo uhluze ubuciko benkondlo eyodwa. Asihlanganeni kuviki ezayo.
