Online Reporter
Ugwalo: Umendo, Olulotshwe Ngubarbara C Makhalisa
Isahluko 15: Siphindela Muva, Sikumbuzo Dabengwa
Lapha sithola uGugu esengohloliweyo, waqhatshwa emsebenzini wokufundisa abantwana abancane. Bamthembisa abaqhatshi bakhe ukuba babengamthatha umnyaka wonke kanti njalo bengamusa esikolo sokufundela lumsebenzi, babuye bamqhatshe nxa eseqedile.
Lokhu babengakwenza nxa wayesebenze kuhle uGugu. UGugu, umlobi ubika ukuba wasebenza kuhle njalo labantwana babemthanda ngoba ezehlisa kubo alingane labo, adlale labo. Ekutshayiseni ngale ngendlini wayefika abambe okwendlini besizana loThulani.
USipho yena wayethi angabuya esikolo afike axoxele uThulani konke ayekwenze esikolo ngesiNdebele ehlanganisa lesiShona.
Ngokuphila lapha uGugu, umlobi uthi wayeselenhliziyo eyayisiziphakele kuThulani. Wayeselothando kuye kodwa ekhathazwa yikuba useselesibopho loNdaba.
Kwakunzima ukuba wayezasithini lesosibopho nanku uNdaba kwakumgceke ukuba wayengasamfuni kodwa wayengezwa ngokuphila kwakhe loThulani wayengacunuka ngomhawu, ambisele ekhaya. Umlobi uyaveza ukuba uGugu wayembhalele izincwadi loyisekazi kodwa ngitsho loyedwa wabo owaphendulayo ngaphandle kukaMusa abasebehlezi belobelana.
Waqhubeka esenza kuhle enanza umsebenzi uGugu.
Ngelinye lamalanga uGugu behleli bexoxa loThulani, waletha umbono ayeselawo wokuba kwakudingeka adinge eyakhe indawo. Lokhu wayekutsho efuna ukudedela indawo akiyo ekaNodumo kanti njalo efisa ukuzifundisa ukuzimela yedwa angeyami emuntwini. Baxoxisana loThulani, emkhuthaza ukuba laye athathe izintombi ayehlangana lazo kodwa uThulani wala ethi uyazisola.
Umlobi uthi uThulani nguye owazuzela uGugu indawo eyayisemnyango wesikolo sabantwana ibuye ibeseduze lekaThulani. Kwathi ngoba uGugu wayeswela izinto zokuyaqala umuzi, wayegcine imadlana eyiyo abambisa ngayo umbheda, wathenga isitofu sephalafina, imbiza, imiganu lokunye. Wathenga lokudla ngeyinye.
NgoMgqibelo, uGugu kuthiwa wabona ngemota ethile izotshiya itafulanyana lezihlalo ezimbili kanye lekhabotshanyana yemiganu. Kweza leyinye ikhabothi eyayilengisa izigqoko eyayilesibuko.
Wamangala uGugu ngalokhu. Wathi esefikile uThulani, wazama ukumsola ngesenzo lesi kodwa uThulani waveza ukuba kakho owayengasebenzisa imali yakhe.
UThulani wazibeka kuhle izimpahla endlini, lanxa uGugu kwakumsinda ukwenzelwa umusa okungaka. Yena uThulani, watsho ukuba umhloniphile uGugu ngoba elikhosikazi lomnikazi. Lendlu wayengamthengela.
Kwavuka imizwa eyayisikubo bobabili kodwa uThulani wamhlonipha uGugu ngokusuka ahambe. Wacaphuka ukuba uNdaba wayengamfanelanga umuntu onjengoGugu. Baqhubeka ngempilo, uGugu esebenza kuhle kodwa eselokwesaba ukuhamba loThulani.
Wayesevala ngokuthi athi uyagula. UThulani kwakumcunula lokhu, ebona angathi uGugu ucabanga ngoNdaba njalo wayesamthanda.
Wayehlezi enqinekile uGugu, ekhala malanga onke. Wayesazi ukuba uNdaba wayezikholisela lezidandane zakhe. Wayengazihluphi ngabo uNdaba lanxa wayesazi ukuba bangaphi. Wayengenelisa ukunombela isitimela ayebabona lomntwana kodwa lutho kokaMpela , uNdaba. Wayengabanaki lakanci.
