Vusumuzi Dube
Ugwalo: Umendo, Olulotshwe NguBarbara C Makhalisa
Isahluko 16
Sikhumbuzo Dabengwa
Siyaqhubeka bafundi kusahluko lesi esizwa kuthiwa uMusa wethekela abangane bakhe eGwelu kabili, uGugu loThulani. Siyezwa ukuba waqala weza eyedwa wasephinda esehamba lejaha lakhe ayeselitholile elalingudokotela esibhedlela ayesebenza kuso, uJoji. Umlobi uthi uGugu wananzelela ukuba laba babethandana njalo befanelene. Batshela uGugu loThulani ukuba babelungiselela ukutshada kunyanga eziyisithupha ezazilandela. UGugu wayezaba ngusonyongwana omkhulu kaMusa.
Sebebodwa uGugu loMusa baxoxa, uMusa esazisa uGugu ukuba akusibuhle bothando nxa umuntu ethole umuntu onguyena uqobo amthanda ngokugcweleyo. Wazesula izinsuku zokuhlanya ayeyikho khona watsho lokuba uGugu loMpela bathandana besesebancane besesikolo uMpela edinga ukubukwa linengi kanti njalo elodumo lokuthandwa ngamantombazana amanengi. Kwavela lokuba wayeke abesenkathazweni kubaphathi aphose axotshwe lesikolo. Watsho uMusa ukuba uGugu wadlalisa indoda eyayimthanda enguThulani elokhu isamthanda lalamhlalokhu.
UJoji loThulani babahleka laba bebabona behleba bobabili njengokwenziwa ngabafazi behlangene. Ngemva kwalingxoxo kwaba lethemba lokuba uThulani wayemthanda uGugu. Babeke baya eGatoma kuboMusa benxusiwe. Bavakatsha njalo ngomunye uMgqibelo bayatshona bekholisa khonale. USipho wayesele koNdebele.
Sebebuyela kwasekuhlwile kakhulu. Phakathi komango bafelwa yimota, okwenza uThulani acabange ukubuyela ayedinga umakanika emagalajini kungakavalwa. Kwasekumele atshiye uGugu yedwa.
Wamcela- ke uGugu, wambuza lokuba wayelesibindi sokusala yedwa egangeni elinde imota. Wavuma uGugu, okwenza uThulani ajabule, adobhe isandla sakhe asange ngokuthaba. Lokhu kwatshiya uGugu elemizwa yothando enhliziyweni. UThulani wabuyela wayadinga umakanika, weza laye esehamba ngethekisi.
Lanxa esephenduke lomakanika wayembiza uGugu uThulani ethi uligugu lakhe waze wamphulula ikhanda. Yalunga imota ngomakanika lo, behlukana bona sebeqonda ekhaya nanku umakanika waveza ukuba imota yayife into encane. Kwabayinhlanhla ngoba uThulani wayethwele imali ethe xaxa ekuhambeni okwenza wenelisa ukugada ayedinga umakanika abuye eze ngethekisi, abhadale lomakanika. Sebebodwa, batshengisela ukuthandana lokuzwelana kumqando lezulu elaselinethe uThulani ngomkhizo lo owawukhona. Baqonda koThulani ukuze bayekotha imbawula benatha lohwithwayo owenziwa nguGugu. USipho babalile koNdebele ukuba bamvuse. Lelithuba bebodwa laletha amalangabi othando.UThulani wathola ithuba lokubuza uGugu ukuba wayemthanda na. Lanxa wavuma uGugu ukuba wayemthanda kodwa wayenqinekile ngoba kweza kuye umfanekiso kaNdaba.
Waphanga wamcela uThulani ukuba amuse kwakhe ngemota. UThulani wayezamile ukumwolela kuzingalo zakhe kodwa uGugu esazi ukuba wendile wazibamba wala ukwephula isithembiso sakhe somtshado. Waphuma emoteni eqonde endlini. Ngalokhu, uThulani wasala emoteni kodwa wamhlonipha uGugu. Wafisa ukuba wesulwe umtshado wabo loNdaba. Koze kube nini emelele.
Online Reporter