Ukuthunjwa kukaSukuzukuduma olwalotshwa, ngu-G. M. P Khiyaza
Sikumbuzo Dabengwa, Izimilo zabalingiswa ziyaqhutshwa
UPAYIVA
Kugwalo uPayiva uvezwe engumlingiswa oligwala. Sibona evuma ukuthunywa nguSinyoro beloZimba yena akhethe ukuphenduka endleleni esengoxega amadolo. Lokhu yikho okwaveza ubugwala ekwesabeni izilo emangweni athi akulingani lalokhu ayengakuphiwa nguSinyoro.
Uvezwa njalo engumlingiswa othanda ukuhluzisisa izinto. Ucubungula udaba lokuyathumba umntwana emaSakadeni athole kunzima ukuzivikela kuzilwane, athole lenkomo ezilitshumi, izimvu ezinhlanu lembuzi ezinhlanu kungesinto angayifela abantwabakhe basale belamba ngenxa yakho.
Uvezwa engumlingiswa onhliziyombili. Indaba yokuqala avume ukuhamba abuye athikaze abuyele emuva imenza abelesimilo sokubanhliziyo mbili.
Ubuye avezwe kugwalo engumuntu olesihawu. Sibona esiba lesihawu esizwa ubuhlungu lapho ebona uSukuzukuduma esuswa ebazalini bakhe ngohlobo lokuthunjwa. Ngesinye sezizatho ezenza wakhetha ukuphenduka.
Ulomusa. Sibona kugwalo etolikela uSukuzukuduma efika eButhembula esethunjiwe emaSakadeni. Ulimi lwalapha ekhaya koSinyoro wayengalwazi esazi isiSakade sakhe.
Ubuye wavezwa elobuntu. Sibona ephatha uSukuzukuduma ngesihle isineke, wayemchazela langamaphupho ayewaphupha okwenza uSukuzukuduma wahlaliseka kulelikhaya.
Wayekholelwa emadlozini, abaphansi, abadala. Sibona eqinisa uSukuzukuduma esenza izigigaba zakhe zokuziphendula athi konke akutshelwa ngabaphansi emaphutsheni abokulandela funa alimale ngokungalaleli.
UZIMBA
Kugwalo uZimba uvezwe njengomlingiswa olesibindi. Sibona evuma ukuyathumba umntwana emaSakadeni. Uthi lanxa ayehamba laye, uPayiva eseguqule umqondo akhethe ukuqhubeka yedwa evikana lezilo zeganga kanti lamaSakade ayesesabeka.
Uzimisele. Sibona kugwalo elala egangeni ezibophele ezingatsheni zezihlahla efuna ukuyathumba umntwana emaSakadeni ukuze athole umvuzo wakhe wezinkomo lezimvu kanye lembuzi acina ekuthola sekuphindiwe.
Usebenza nzima. Usebenza athole inzuzo ephindiweyo ngenxa yokuzimisela emsebenzini onzima owawungambulalisa kodwa yena wawenza wawuphutsha kuhle.
Ungumuntu oma elizwini lakhe. Wala ukulandela uPayiva ekhumbula izithembiso ayeziphe uSinyoro. Waqhubeka ehamba yedwa kumsebenzi kaSinyoro.
Ulozwelo. Sibona ekuhambeni kwakhe lomntwana onguSukuzukuduma emphumuza ngokumbeletha etshengisa ukumkhathalela lapho sebeqonde ekhaya eButhembula.
UMJAJI
Ulikholwa. Ukholwa konke akutshelwa ngabantu lapho kudingwa umntwana. Wakholwa bemtshela ukuba kwakulezilwane ezazibonakele wacabanga ukuba yizo ezazidle umfana.
Ukholelwa ezinyangeni. Wavuma etshelwa yinyanga yakhe yeMazizini ukuba umntwana wayebulewe ngumuntu wekhaya.
Kahlolisisi kuhle. Sibona esekela udaba olwalethwa yinyanga eyodwa walandela eziyisificamunwe munye ezaqamba amanga zisithi uMaXaba ngumthakathi obulele uSukuzukuduma.
Ungumbusi oyisithutha. Kananzeleli izinqumo azenzayo ngoba wabulala izithunywa ezintathu ezazithunywe nguSukuzukuduma esebuyela ekhaya. Asihlanganeni kwelizayo bafundi.
