Innocent Kurira
UMONGAMELI weZimbabwe Football Association (Zifa) uNqobile Magwizi utshayelwe ihlombe ngokusebenza kwakhe, enconywa ngokuthi usekhokhele inhlanganiso le ngendlela efaneleyo, eletha isithunzi lokwethembeka.
Lokhu kuza ngemva kokuba iZifa ithengelwe ibhasi libhanga le-Ecobank. Ibhasi le izasetshenziswa ngamaqembu elizwe emidlalweni. NgoLwesithathu ekuseni, ibhasi le ibikoBulawayo lapho umgcinisihlalo weZifa emhlubulweni ongezansi yelizwe, uChris Mtungwazi abonge khona imisebenzi kaMagwizi lokubambisana lebhanga le-Ecobank.
“Sithanda ukubonga umongameli wethu, uNqobile Magwizi ngomsebenzi awenzayo ekuthuthukiseni umdlalo wenguqu kuleli. Lokho akwenzayo kuyisibonakaliso sendlela okumele ilandelwe emdlalweni,” kutsho uMtungwazi.
Ukuthengwa kwebhasi le, kungaphansi kwenhlelo zeZifa lombono wenhlanganiso oweDream 2030.
Kumbono weDream 2030, iZifa ihlose ukuthi ibumbe iqembu elizenelisa ukudlala kumncintiswano wenkezo yomhlaba.
Ekhuluma ngemva kokwethulwa kwebhasi koBulawayo, uMike Dengwani, oyisikhulu ebhanga le-Ecobank uthe usekelo lwabo alusoke luphelele kumaWarriors, kodwa luzasabalala lakwezinye ingatsha zenguqu elizweni.
“Ibhasi le, ingumzekeliso wesithembiso sethu sokusekela iZifa lombono wayo ka2030, lapho ilizwe elihlose ukuthi liyefika emncintiswaneni wendebe yomhlaba,” kutsho uDengwani,
“Ibhasi le, izaphinda njalo incedise kwamanye amaqembu ebhola lenyawo amela ilizwe. Ukukhula komdlalo kudinga ukubambisana, ngakho njenge Ecobank sikhona ukuthi sifake isandla, sonke sibe lempumela enhle. Okuqakathekileyo kukho konke yikuphakamisa ithalenta labadlali lokuguqula impilo zabantu.”
