Online Reporter
Ugwalo: Emfuleni Wezinyembezi olwalotshwa nguEzekiel S K Hleza
Ophezulu Stinta
Ngeviki edlulileyo sitshiye indizamtshina elabo Mgandane isingena amayezi, iqansa labo, kukanti isiphetho sesisobala. Abantu bonke basuka baqonda emizini yabo, izidumbu lazo zaqoqwa zafakwa ezimoteni zalungiselwa ukuya thungelwa ngomlilo.
Ezintabeni zaseMapate, yayihlomile ekaMgandane igaxe iphelele, yayingalalanga ngitsho, yayingabuqutha njani ubuthongo isimo sisibi kangaka. Kwasekudingwe lamadoda angamatshumi tshumi lawo ke ayengo ngqongqotshe ekwethuleni indizamtshina emoyeni.
Bayizwa iduma indizamtshina bahle bachitheka bathi safa kodwa lokhu bakwenza belokhu begodle bephelele.
Ikhomrade lase livele lihlome laphelela selilingisa lokuthi leyo ndiza ke yona lali ngayiwisa ngokuphazima kwelihlo.
UHwayibhetshu, ongomunye wabalwayo wayelokhu exhume ewayilesini, wakhuza ngelithi umuntu otshayela indizamtshina le ubiza ikhodi yabo okuyinombolo yemfihlo eyaziwa ngabekhaya kuphela, njalo wayefuna ukwehla khonapho kibo.
Isikhathi sempi le kusobala ukuthi yisikhathi sekulentuthuko ethile elizweni lasebantwini loba nje siyibona kakhulu kuhlangothi lwempi, kwakukhulunyiswana ngezinga eliphezulu kakhulu, abasemoyeni labaphansi belakho ukuqondisana ngendlela emangalisayo.
Ilizwi lomuntu owayephakathi kwendiza babelijayele kakhulu, ekhuluma lolimi abalwaziyo. UHwayibhetshu wayesezibuza eziphinda ukuthi kambe ngabe abafana abamaqhinga abo babephumelele na emaqhingeni abo, kwasekumele akhuze lo owayelokhu esukumisa isikhali semisayili okwakungacina sekubangela ingozi ababeyenqabela.
Umsindo wombhobho usuthule, yeza ihelikoptha yafika nje yathi dzi phansi, abafana beganga bathi wathalala phansi, imibhobho yonke beyikhangelise kuyo, akwaziwa okwakungaqhamuka lapho. Wehla uSpinoza phakathi kwendizamtshina ethwele izandla ekhanda okwakutshengisa ukuthi akalwi lomuntu, kaphathanga sikhali ngokufanayo. Omunye wabafana beganga esembonile ukuthi nguye wadubula eceleni efuna ukumethusa, kuyindlela abadlala ngayo leyo njalo bejabulelana ukuthi ngempela iqhinga laseliphumelele.
Wakhuluma ngelizwi eliqhaqhazelayo uSpinoza wababuza abafo ukuthi kambe wayengawenzanga na umsebenzi ayethembise ukuthi uzawenza. Bonke baya kuye bafika behlisa izinyembezi, kwabanzima ukukhipha amazwi kodwa kwaba lula ukujuluka kwezinyembezi, loba nje kuthiwa inyembezi zendoda ziwela esifubeni.
