Online Reporter
Ethel Ncube
KULEMULI yakoTokwe yeTshabalala koBulawayo edinga usizo lwemali engangeUS$2 000 yokuba ilunga layo lihlinzwe unyawo olwephuka kathathu kulandela ukwehlelwa yingozi yemota eyatshaya abantu abayisithupha, abathathu bahle bedlula emhlabeni kunyanga ezimbili ezedlulayo bevela enhlane.
Inina leli, uNkosazana Tsitsi Kajakaire oleminyaka engu-38 useqede inyanga ezimbili esesibhedlela seMpilo lapho elatshwa khona ngenxa yokusweleka kwemali yokuba afakwe insimbi enyaweni olwephukayo.
Ngaphandle kokuthi ufuna ukuhlinzwa unyawo, ulomthambo njalo okubikwa wadabuka osokubangela ukuthi amaphaphu akhe angenelisi ukukhipha amanzi emzimbeni ngendlela efaneleyo nanko sowaze wafakwa amatshubhu okuwakhipha emzimbeni.
Intatheli ivakatshele esibhedlela seMpilo ngoLwesibili emini lapho exoxisane khona loNkszn Kajakaire oveze ukuthi uphakathi kobuhlungu.
“Ngisesibhedlela lapha ngizwa ubuhlungu, ngidinga usizo lwemali yokuthi ngiyethengelwa imithi kunye lamaphilisi okufunekayo ukuze ngenelise ukuhlinzwa unyawo lufakwe insimbi.
“Angivuki, ngiyafuthelwa. Unyawo ludinga ukuba luyefakwa insimbi, insimbi yakhona esibhedlela ayikho. Unyawo lwami lwephuka kathathu kungakho ludinga ukuthi lufakwe insimbi ukuze luhlangane.
“Sengilenyanga ezimbili ngilapha ngingaboni labantwabami ikakhulu lo omncinyane ngoba kavunyelwa esibhedlela.
Ngiyabakhumbula kakhulu, ngicela uzulu angincedise ngemali engange-US$2 000 ukuthi konke kwenele bangifake insimbi ngibuyele ngekhaya ngiyeselela abantwabami,” kutsho uNkszn Kajakaire ehlengezela inyembezi.
UNkszn Kajakaire ulabantwana abathathu omdala sowaqeda izifundo zakhe ze-A-level, oqede i-O-level loleminyaka engu-10.
Uthe yena lomkakhe bayazisebenza kungakho ukulimala kwakhe sokubangele lokuthi umkakhe angenelisi ukuqhubeka edinga imali yokuthi baziphilise njengemuli.
UmkaKajakaire, uMnumzana Aloise Tokwe ugcizelele ukuthi badinga usizo lwemali.
“Ngidinga ukuncediswa zihlobo zami, kufunakala umuthi, amaphilisi lokunye. Konke kuyabiza. Umama ufuna ukwenziwa i-operation yonyawo, imali efunakalayo yi-US$2 000.
“Mina bengizisebenza manje okwakhathesi ngimile ngitshona khonapha esibhedlela. Umama ngibuya malanga wonke ngizomkhangela, ngigada nsukuzonke kungakho angiselamali.
“Ngicela ukuncediswa zihlobo zami ukuze unkosikazi asile lami ngikwazi ukuphandela imuli. Kwesinye isikhathi ngiyamthwala ngimusa ku-X-ray ngoba lama-lift kawasebenzi, yebo omongikazi bayabe bekhona kodwa ngicina ngimthwala ngoba kungela ngenye indlela.
“Abafisa ukusincedisa bangaphosela abalakho ku 0772117717, ibizo nguAloise Tokwe,” kubika uMnu Tokwe.
Uthe usesehluleka ukuyaphandela imuli ngoba izikhathi ezinengi nxa efika esibhedlela kuyabe kukhona okufunakalayo ayabe emele agijime ayekuthenga akuse kumadokotela ukuze umkakhe elatshwe.
UNkszn Kajakaire ngomunye wabatshaywa yi-Honda Fit bengu-11 besuka enhlane labanye eTshabalala mhlaka 26 Zibandlela.
