adminSilo Ophezulu Sthinta
Kuleliviki sikhangela incwadi elesihloko esithi ‘Incwadi evela Ejele.’ Indatshana ivula ngomzali olesifiso esihle ngomntanakhe. Kusegcekeni ukuthi umfundisile umntwana lo ngethemba lokuvuna okuhle ngemva kokuhlanganyela akwenzileyo.
Uzibona laye esengadla ukudla okungcono abuye njalo ahlale ezindlini ezikhangelekayo. Yisifiso somzali wonke othe wenzela umntanakhe konke ngempilo.
Kupha umlandu kibo abantwana ukuthi bananzelele lokho okufiswa ngabazali babo lapho bebathumela esikolo.
Umzali esilaye lapha nguSikhakhane indoda eyayisebenza kanzima ethwala izigodo egangeni laseKranskop abuye kube nguye ozethula lapho ezazisiswa khona –Aranisi.
Yayiphansi kakhulu imali ayeyihola phezu komsebenzi onzima kangaka, kodwa phezu kwakho konke wayesenelisa ukondla inkosikazi yakhe uMaDlomo abuye njalo abhadalele indodana yakhe indleko zesikolo.
Indodana yabo uSimangaliso yayisifike kuzinga lasekolitshini laye uSikhakhane esebona nje ukuthi wayesezathola umsizi nanku phela uMaDlomo engumuntu owayesetshona elele ngenxa yokulimala okwamehlelayo.
Yayinde inhliziyo kaSikhakhane kukanti lesihawu sasikuye. Nangu phela wayethi engatshayisa emsebenzini afike aqale ngezokupheka. Kukanti lokuhlamba impahla lapha ekhaya kwakukhangele yena ekwenza nje engakhononi.
Kumveza-ke engumlimgiswa olothando oluqotho komunye wakhe kazange amlahle ngoba eseyisilima.
Kwathi nje ngenye imini eyisithutha kwafika incwadi lapha ekhaya. USikhakhane yena wayelovalo ngayo ukuthi mhlawumbe yayiphuma kulomfo ayemkweleda impuphu yakhe.
Wayivula ngeliqhaqhazelayo wahle wagijimisa amehlo wabona ukuthi yayivela kuSimangaliso, okwakumdida-ke yikuthi yindaba incwadi le ivelela eMgungundlovu.
Wacabanga ukuthi mhlawumbe uSimangaliso wayehambe lapho ngesikolo. Wayifunda incwadi le, wezwakala esiqhinqa okwesifazana.
Kwacaca lakuMaDlomo owayecambalele embhedeni ukuthi kwasekulomonakalo thize.
Wakhala ngemali yakhe, isikhathi sakhe okwasekuphele emoyeni. Incwadi kaSimangaliso yayibika ukuthi wayesejele evalelwe ngecala lokutshontsha iyembe.
Wayelandisa indaba yakhe yokuthatheka ngabangane ababephila impilo ephakemeyo lapho eziqathanisa labo.
Babephila ngokuswenka begqoka impahla zemali ephezulu. Yena ke wasuke walibala ukuthi yena uzalwa ngumyanga.
Online Reporter