Online Reporter
Umdumo Wezinkondlo
Iqoqo elalotshwa nguNS Sigogo labanye
Ophezulu Stinta
Inkondlo: Ngiyakwesaba Wethu
Okumunyethweyo
Siqhubeka ngokumunyethweyo kwenkondlo yethu. Sinanzelela ukuthi, owesilisa ngezinsuku zokuqala, uqala ephatha owesifazana ngesandla sothando, isandla esifudumalayo.
Kuthi ngokuhamba kwesikhathi, owesilisa uyaguquka abambe ngesandla esilukhuni, kuguquka lamazwi ayemphatha ngawo. Sikubona lokhu lapha imbongi isithi:
Amazwi akh’ amnandi ngezinsuku zakuqala,
Kodwa ayimbabazane owesintwana esekwejayele
Kuyamangalisa indlela owesilisa aguquka ngayo, uguquka aze aguquke lombala, konke lokhu owesifazana ukhangelelwe ukuthi abambelele kikho konke, angaguquki.
Imbongi isivezela amandla omuntu wesilisa phezu kowesifazana, utshengisela amandla akhe okusobala nje ukuthi ayikuhlukuluza umuntu wesifazana, kungabe kusazwisiseka ukuthi uthando lwayizolo seluyengaphi. Abantu besifazana bayagqilazwa ngokusetshenziswa nzima.
Uyabusa kulu mhlaba ngempilo oyiphilayo.
Uthath’ owesintwana abe yisigqili sothando,
Uphind’ umenzi imbongolo yakho njalo.
Owesifazana usetshenziswa okungela mpumulo, sengathi akusumuntu kodwa yena ekhangelelwe ukuthi abengumsizi kungabi nguye obhekana lobunzima bonke kanye lemisebenzi yonke enzima.
Kuzwisa ubuhlungu lokhu okwenziwa ngowesilisa phezu komuntu wesifazana, kuze kufaniswe lokuthi yena ulezulu lakhe emhlabeni loba nje kuthwa akula zulu, yena kusobala uphila phakathi kwalo ngendlela aphatha ngayo umuntu wesifazana.
Wenza konke akufisayo okusobala yikho okujabulisa inhliziyo yakhe, uphila izulu emhlabeni.
Balingen’ igehena lasemhlabeni abesintwana
Uyinyamazana ban’ engafun’ ukuthethele?
Ulawo amabutho njengamakhosi endulo
Siyananzelela inhliziyo elochuku kulo owesilisa, ukuthi yena vele ngunhliziyo kayijiki, njalo akusuyemuntu woxolo, oxolela owesifazana mahlayana nje. Angaphanjaniswa vele yena kaxoleli, ngumuntu obamba isikhwili.
Kusobala ukuthi umuntu wesifazana uyapika lapha kulo umuntu owesabeka kangaka, olenhliziyo elukhuni.
Phezu kobunzima bonke lobu obuhlangana labantu besifazana, kuyamangalisa ukuthi baqhubeka beyizinama njalo kubo abesilisa laba abaxexebuki, abasuki njalo ababatshiyi loba sekutheni.
Kambe kungabe kusenziwa yikuthi baya besesaba babone kungcono ukunamathela lolo dubo.
Endaweni yothando abesilisa sebebonakala ngokusebenzisa ulaka, kulapho abazwakala ngephimbo elilomfutho ukuthi ngempela bakhona njalo kulapho ababusa khona.
