Online Reporter
Ugwalo: Umdumo Wezinkondlo elalotshwa ngu NS Sigogo labanye.
Inkondlo: Selidumile Izulu eyalotshwa ngu AZ Mazinyane
Ophezulu Stinta
Okumunyethweyo
Inkondlo le ikhuluma ngokwaliwa; ukuphela kothando imbongi eyahlangana lakho. Imbongi ilandisa ngosuku lapho eyamukela khona incwadi eyayivela kulowo othandwa yinhliziyo yakhe. Lesandla sakhe wayesazi esiqonda ukuthi lo owayebhale lapha ngothandwe nguye, wayivula incwadi ngezandla eziqhaqhazelayo lenhliziyo ikhangelele amazwi acicimayo, amazwi othando.
Eseyivulile incwadi amehlo agijima agcwala indawo yonke edinga amazwi ajayelekileyo, amazwi othando, kodwa ke amehlo abona ibizo lakhe qha waziduduza ngelithi mhlawumbe kaboni kuhle, lunjalo phela uthando luvele ludinge lokho qha okufunwa yinhliziyo nxa kungekho aluboni ke lona ukuthi kuyasilela.
Inhliziyo yaqala ukubuna yaqala ukudana kukhona okwakutshaya amanzi kukhona okwasekuyephula inhliziyo imbongi le.
Imbongi yadibana lamazwi ahlaba inhliziyo, amazwi ephula inhliziyo ibeyizicucu, imbongi layo yayingawazwisisi amazwi la, othandwe yinhliziyo yakhe wayesebike ukuthi uhambo lwabo lwaselufike emaphethwelweni kogoqa nyawo, lwalungasadluleli phambili.
Amazwi akhona ayelotshwe nje emafitshane kodwa ke ayequkethe okukhulu okusinda inhliziyo yembongi.
Emva kokufunda amazwi la, imbongi yahle yaba losuku olumnyama, yacitshelwa lilanga kwafiphala konke ukukhanya.
Amazwi eyahlangana lawo kakusimazwi ayewakhangelele,impilo yahle yema mpo, isandla asijayeleyo saguquka samlethela umvimbano, imbongi yangenwa ngumqando labantu bamangala bembona eqhuqha engenwa ngumvimbano libalele.
Ngempela ithemba kalibulali ngoba iyatsho mbongi ukuthi layo ngabe yahle yawela phansi yaya kogoqwa nyawo, kodwa yavuka kwathi ngokuphola kwamanxeba yabuya njalo yacenta indlela entsha. Phezu kwakho konke ukwephulwa inhliziyo ayizange ilahle ithemba, ayizange njalo ifikelwe ngumcabango omubi,wayifisela okuhle empilweni. Izilonda zenhliziyo zaphola welapheka.
Ukusetshenziswa kolimi
Imbongi isebenzise ulimi oluhlabusayo okwamagama ekulobeni inkondlo kwaze kwadaleka lomfanekiso emqondweni wofunda inkondlo wayibona isigodola ingenwa ngumvimbano libalele. Imbongi iyabonakala ngomfanekiso wengqondo isiqhuqha kuze kutshayane lamazinyo.
Lapha sithi imbongi isebenzise umfanekiso:
Nganyukubala,mntanomuntu,
Ngabanjwa ngumvimbano
Basola sengigqok ibhatshi libalele.
