UKUHLuzwa kweNKONDLO

Ukuhluzwa kwenkondlo, Umdumo wezinkondlo: N. S Sigogo labanye
Inkondlo: Okwami ngokwezandla eyalotshwa ngu AJN Ndlovu

 

Ophezulu Stinta

Okumunyethweyo
Inkondlo le ihaywa yimbongi ephakathi kobunzima obukhulu kakhulu obokulahlwa yibunzima bempilo, impilo yabo yonke ibe ngeyobunzima. Kuthi kusenjalo kube khona abanye abalenhlanhla yamaswazi abakhomba ngophakathi, bephila impilo enethezekileyo, yibo imbongi ethi “Bezwakala bebong” oDojiwe sebakuthola okwabo badla, baphumula baze bahlala. Imbongi isaphezu kobunzima bempilo yabuye yazithezela olulenkume lapho isithatha unkosikazi.Yasuka yawela phezu kowesifazana omubi ngempela olezenzo ezimbi, ezazimhlukumeza inyama lomphefumulo engakwazi ngitsho lokulala.Imbongi iyakhala ngonkosikazi wayo olitshapha njalo uthi lapho engena endlini avele ahlangabezwe yizibi pho izaphumulela ngaphi, nini njalo. Ubunzima bempilo lobu bumtshaya nxazonke,walima kwadliwa yizifuyo zabanye sengathi ulimela zona izifuyo zabanye lezi.

Pho uzakuthatha ngaphi ukudla lekati isilala eziko, sekhalela lokuthi ngabe uyathola umsebenzi kodwa lokhu, aqhatshwe ukuze laye athole okokudla, axotshe indlala esiyakhele egumeni lakhe.Imbongi yazama konke konke okungathuthukisa impilo,yahamba esikolo kayiphumanga lolutho,yazama ukudla ngesibhamu kwehlula, yalubhekisa emadolobheni ngethemba lokuthola impilo engcono, lokho lakho kwayehlula okwamagama.

Yakhangela ezihlotsheni, lazo zazingela mpendulo, yalubhekisa enkonzweni, abafundisi bamqinisa ngelithi kakhuleke kakhulu angadeli, njengomuntu ohanqwe yizinto wabuye njalo walubhekisa kuzanuse lazo ezafika zamkhomba indlela yokuthethela ngethemba lokuthi abaphansi bazakuzwa ukukhala kwakhe. Nxa sekuxubene lenkolo kanje pho eyayisebenza yiphi, lakho ukwenziswa yikuhlupheka njengoba betsho abadala ukuthi akwaziwa okwanonisa ingulube.Ikhala imbongi ize ifike esigabeni sokulahla ithemba ukuthi loba kuthiwa okungapheliyo kuyahlola lokhu okwakhe kuyisimanga ngoba kusobala kulubhekise phambili akujiki.

Ukusetshenziswa kolimi
Imbongi isebenzise ulimi oluhlabusayo okwamagama, okwenze inkondlo yakhe yawuthi bha umfanekiso womuntu ohluphekileyo.

Isebenzise isibabazo lapho isithi “okwami khona ngokwezandla! ”lapha ibigcizelela ubunzima ahlangana labo empilweni ukuthi kakula ndlela okungathiwa kuguquke ngayo.

Ibuye yasebenzisa isaga njalo lapho isithi “ikati lilala eziko” lapha iveza izinga elikhulu elendlala esemzini wayo.