Vusumuzi Dube
Ugwalo: Umdumo Wenkondlo owalotshwa ngu N.S Sigogo labanye
Inkondlo: Thando Uyinqaba eyalotshwa ngu EJ Ndlovu
Ophezulu Stinta, Okumunyethweyo
Inkondlo le ilandisa indlela imbongi eyayikholisa ngayo isencinyane izikholisela uthando lwabazali lwayo ababeyiphethe kuhle okumangalisayo ikhomba ngophakathi. Siyibona ize itsho layo ukuthi yayiphakathi komhlane lembeleko.Imbongi le ngesikhathi isencane ikhula kwakumnyama kuyo ngezothando lezi yayingazi lutho ngezinto zothando.
Kwathi ngokukhula kwaqala manje yaqala layo ukunyonyobelwa yimizwa yothando kancane kancane okusobala layo yayisiqala indaba zemathandweni lezi.Kwaba yisimanga kwaba bukayo ukuthi imbongi le layo yayisiqala ukungena endabeni zothando loba nje yayembeswe yibunyama bempisi ukuthi kuyini uthando lolu. Ngokukhula lokujula endleleni yothando imbongi yaqala ukuzwa indlela yakwabo siyileyo ebabayo, kukhona lapho ayesethole khona itshukela, lapho ayesethande khona.
Uthando lolu lwamenza wathatha lowo ayesemthandile kwamenza wamkhonza wamthanda okudlulisileyo, wafulathela konke okwangakibo walibala sibi sabazali bakhe, lapho esithi “Wangenza ngatshiya abazali, wangenza ngatshiya labangane bami”. Wadela konke okwakubiza yena wanamathela kulowo owayesemthandile.Ngenxa yothando lolu njalo imbongi yafulathela inkonzo yangakibo lapho ababekhonza khona beyimuli waqonda lapho okwakukhonza khona lo owayesemthandile ngenhliziyo yakhe yonke, kwamenza wangaboni lokuqakatheka nkenkonzo yangakibo kumbe isonto lakwabo.
Uthando lolu lwalumandla ngempela,imbongi pho yayisabona na okuyikho nanso yaze yalahla lamasiko akibo yakhetha amasiko akibo kalowo asethandane laye igcizelela isithi:
“Ngalahl’ inkonzo yakwethu ngathath’ eyakho, Ngalahla amasik akwethu ngathatha awakho,ngabangumntwana ngafunda awakho”
Yayizimisele okwamagama yafana lomntwana ofunda umkhuba omutsha awubambisise njalo ngokugcweleyo.Wakhula laye wayekela ukuzitotoza wafunda konke ngothando waphuma ezingeni lobuntwana,wathandana lesithandwa sakhe ngothando olujulileyo baze bathathana baqinisa uthando lwabo ngezifungo zokuba nyamanye.Makhulu amandla othando, luyamkhulisa umuntu, lumondle lumfundise kanye lokubekezela aze abe ngokhulileyo kuzibanga zonke ezempilo, mbongi igcezelele isithi:
“Thand’ ulokubekezela, ulungile kulakho konke. Ngiyavuma wena uyinqaba yami.”
Online Reporter