admin
Nkosilathi Sibanda
KWEHLULA ukuthi uDenzel Khumalo adlale aze abonakale ukuthi uyingcitshi kuqembu leHighlanders lakuFC Platinum, kodwa usefike wathola ukwamukelwa kuhle kuChicken Inn.
Umdlali lo, uthe uthembisa ukuthi agcwalisise izifiso zomqeqetshi uJoey Antipas zokuthi ayithwale futhi inkezo yeCastle Lager.
Kungxoxo abelayo lephephandaba likazulu ngoLwesithathu ekuseni, uKhumalo ubike ukuba sekuleminyaka efunwa ngumqeqetshi uAntipas ngakho uze wamthola ngesikhathi esifaneleyo.
“Ngizizwa ngisekhaya kuleliqembu. Ngilande ukuzonqoba. Ngizadlala ngendlela elingakaze liyibone,” kutsho umdlali lo.
“Ngithanda ukubonga umqeqetshi wethu uAntipas. Kungayisuye ngabe angikho lapha, wangidinga waze wangithola ngemva kwesikhathi eside.
“Abalandeli bomdlalo abangibona ngisadlalela amanye amaqembu, bazathola ukuthi sengitshintshile, sengidlala inguqu yohlonzi ezenza iChicken Inn iphenduke ibe yintshantshu kuligi.”
Lakanye uAntipas uyamthanda lumdlali ngoba kazange akufihle ukuba uyathokoza ngokuza kwakwe eqenjini.
“UDenzel ngumdlali ozakuba yinsika kuChicken Inn. Uza lobungcitshi lethalenta ebesingelalo,” nguAntipas lo.
U-Antipas uthe ukhangelele ukuthi iqembu lakhe lenze izimanga kulisizini ngoba akula elinye iqembu elilabadlali abalohlonzi njengalabo asebakhethile. Uke wayithwala inkezo yeligi leChicken Inn ngesizini ka2015.
“Kuhle ukuthi ngikubeke sobala ukuthi ngifuna ukuba yintshantshu yeligi,” kutsho lumqeqetshi ekhuluma lephephandaba likazulu eqeda ukulolonga abadlali ngoLwesithathu ekuseni.
Sebengene batshintshana abaqeqetshi kulithimu kodwa kusehlula ukuthi bayithathe inkezo yeligi okuveza ukuba uAntipas nguye yedwa oyenelisayo.
Umqeqetshi lo uthe ngokuza kwabadlali abanjengoDenzel, iqembu lizaguquka libe ngelesatshwayo lonyaka.
“Ngilesiqiniseko sokuthi lonyaka sizayithatha inkezo yePSL, labadlali bazimisele kakhulu. Lonyaka yithi inkunzi njalo lenkezo yePSL ngeyethu,” kutsho Antipas.
Unobhala weChicken Inn uTavengwa Hara uxwayise abadlali babo ukuthi behlale bekwazi ukuba iChicken Inn liqembu elihlala liphezulu.
Online Reporter