admin
Buhlebenkosi Gaule
ABALIMI bakuleli sebekhuthazwe ukuthi balime izilimo ze-horticulture ezifana lehanyanisi kanye lamatamatisi ngoba zilakho ukubenza babe lenzuzo enhle nanko phela loHulumende esefake imithetho yokwehlisa inani lokudla okungeniswa kuleli kuvela kwamanye amazwe.
Abalimi abazimele bodwa abakhulume loMthunywa ngenyathelo likaHulumende leli baveze ukuthi leli lithuba labo njengabalimi ukuthi balime kakhulu ukuze kungasileli ukudla kuleli.
Omunye umlimi okhulume loMthunywa uMnumzana Connie Msipha owesigabeni seZimbili uveze ukuthi njengabalimi sebelakho ukuthi bazitholele inzuzo enhle nxa bangasebenza gadalala njengoba sekuzakuba nzima ukuthenga ukudla kwamanye amazwe kuleli.
“Njengabalimi khathesi silakho ukuthi sizenzele imali enhle ngokulima izilimo ezifana lehanyanisi ngoba yenza kuhle kakhulu ngesikhathi somqando.
“Ihanyanisi yisilimo esihle sokulima ngemva kokuba abalimi sebevune isivuno somnyaka ophelileyo ikakhulu laba ababelime umumbu ngoba umhlabathi uyabe usavundile njalo ukulima isilimo lesi kuyaphathisa ukuba umhlabathi uvunde kakhulu,” kutsho uMnu Msipha.
Uqhubekele phambili uMnu Msipha esithi ukuhlanyela ihanyanisi kufuna ukuba umhlabathi uqale uhlakulwe kulungiselelwe ukuwalima ukuze singahlaselwa lukhula.
“Ngemva kokuba amaxhakela ehanyanisi esehlanyeliwe ensimini athatha amalanga amathathu ukuze abambe, kuthi ngemva kwamaviki amabili amahlamvu akhithike.
“Nxa engasakhithikanga umlimi kumele awakhithize ngezandla lokhu kuyanceda ukuba ihanyanisi ikhule kuhle.
“Nxa amahlamvu engakhithika umlimi uzamelela ukuba amaviki amathathu adlule ihanyanisi ilokhe ingaphansi komhlabathi ngemva kwalokhu ihanyanisi iyabe isilungele ukuvunwa,” kutsho uMnu Msipha.
UMnu Msipha uphethe ngokucebisa abalimi ukuba bengalandela indlela eyiyo yokulima ihanyanisi kuzabaphathisa ukuba bathole inzuzo njalo umhlabathi ungayekelwa ungasetshenziswanga kulindelwe isikhathi sezulu ukuze kulinywe umumbu.
Online Reporter