admin
Pumulani Mpofu
Kuqakathekile ukuba abantu bengahlela ukuthi bathathane bahlale bonke njalo baqalise lemuli bahlanganiswe ngomtshado okuthiwa yiMarriage Act Chapter 5:11. Zinengi izinto ezehlela omama labantwana babo ngemva kokuba ubaba abhubhe bengatshadanga.
UNomagugu Mpofu wayethethwe nguBrian Moyo kodwa bengatshadanga. Babehlezi kuhle sibili eMagwegwe bethandana belabantwana ababili. Izihlobo zakoBrian Moyo zazimazi uNomagugu Mpofu konke labantwana lokuthi kwakungabantu ababehlezi kuhle nje bethandana. UBrian Moyo wabangumuntu osegula, wayalaliswa esibhedlela seMpilo kodwa ukugula kwamkhulela waze wabhubha.
Ngemva kokubhubha kukaBrian Moyo izihlobo zahle zaqala ukuhlupha uNomagugu Mpofu labantwana. Kwathi noma uNomagugu wayekhuluma lezihlobo zikaBrian ukuthi bathathe incwadi yokufa kaBrian Moyo babembuluza bethi abalasikhathi. Izihlobo zikaBrian zazisithi kaphume endlini ngoba yena loBrian babengatshadanga ngakho kalayo imvumo yokuthi ahlale endlini.
Izihlobo zikaBrian zathatha yonke into ayisebenzelayo lomkakhe yena waxotshwa nje labantwabakhe. UBrian wayetshiye imali enengi kodwa wayengenelisi ukuthi ayithole uNomagugu Mpofu ngoba engelayo incwadi yokufa kaBrian. Ngenxa yokuba uNomagugu loBrian babengatshadanga kwakumele uNomagugu abe labafakazi bakoBrian ukuze athole incwadi yokufa.
Wazama ngazo zonke indlela ukubancenga abakoBrian ukuba benzele abantwana kodwa akula loyedwa owaba lesifiso sokuba uNomagugu Mpofu ancediswe. Wadubeka uNomagugu Mpofu labantwabakhe engela ngitsho imali yokuthi baziphilise labantwana baye esikolo. Wazama ukuba akhulume labesikolo abantwana babe bebhadalelwa yiBeam kodwa ukuze abantwana babhadalelwe yiBeam incwadi yokufa kaBrian Moyo yayifuneka futhi.
UNomagugu Mpofu wasesizwa ngeTrinity Project wasesiya khona ukuba athole usizo.
Isixwayiso asitholayo kwakungesokuthi selokhu besala ukumncedisa kungancono amangale emapholiseni ngoba kulilungelo labantwana ukuthi bathole ilifa labo, wathatha lesi isixwayiso wayamangala emapholiseni. Emveni kokuba amapholisa sengenele yikho lapho abafowabo bakaBrian abaqalisa ukunceda uNomagugu Mpofu.
Yasithathwa-ke incwadi yokufa, uNomagugu Mpofu wabhalisa abantwana kuBeam wenelisa lokuthola imali emsebenzini kaBrian Moyo. Lanxa wakwenza lokhu impilo yakhe uNomagugu Mpofu labantwana yayisibuhlungu ngoba basebethathelwe impahla basala bona bengelalutho.
Ngakho-ke abantu bayakhuthazwa ukuba batshade ngomtshado ka5:11 nxa sebethathene ukwenzela ikusasa labomama labantwana bangazitholi besesimeni sikaNomagugu Mpofu. Kunzima ukuthi izihlobo zihlukumeze umfazi oyabe wayetshadile lomufi ngoba umthetho uyamvikela labantwabakhe ukuthi bangathathelwa impahla yabo. Ngabe uNomagugu Mpofu wayetshadile izihlobo zikaBrian zazingasoze ziphumelele ukumthathela imphahla yakhe lokuxotshwa endlini ngoba umthetho wawuzamvikela labantwana.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773 195 055
Online Reporter