admin
KUVIKI edluleyo besiseLupane. Kule iviki siseFolosi, eMosi oa Tunya — impophoma ezithunqayo. Angithi phela sivele saphetha udaba lwethu lwenkuthazo yabacuphi beCID Lupane kwabe-Eco-Cash, Tele-cash le One wallet sisithi, kumele bahlole abantu ababasizayo besebenzisa izithupha zakoMsitheli lemitshina yokuhlola imali (detectors). Lamuhla sizakuzwa ukuba abacuphi be CID Victoria Falls bona bathini kuzulu besesiphetha ngokwethula impumela yemincintiswano ye CID Matabeleland North 2016 District Criminal Investigation Officer (DCIO) Sports Gala eqhutshelwe eHwange ngoMgqibelo.
Izakhamizi zeFolosi zicetshiswa ukuba zisuse impahla eqakathekileyo efana labomakhalemkhukhwini, ama-laptop lemali, duzane lamafasitela. O“tsotsi” babhoda njalo nje bedinga impahla enjengale ngakho uma selisiyolala, lingayitshiyi egcekeni. Inkuthazo le ingabe yethulwe yiFolosi kodwa lizananzelela ukuthi ivele ingeyethu sonke bakwethu. Njengemali ngokwayo, kumele isiwe ebhanga, lingagcini amaqubaquba emali ezambeni kumbe ezindlini.
Abaqhuba umsebenzi wezandla emikambo yeChinotimba, koMai Tee Restaurant, eMoringa le Comesa eFolosi, bethekelelwe ngabacuphi babo bebonisana ngendaba zakoCALA lomzali wakhe uSigilamkhuba. Kubikwa babumbe iqula lomkhankaso lomphakathi wonke kulelodolobho besithi: kuhle ukubika indaba zamacala lakho konke okusolisayo emapholiseni kusetshenziswa ama-suggestion box, incingo (013-44201 / 0773036479 Detective Sergeant Masimba (Community Relations and Liaison Officer — CRLO), le WhatsApp; ukusola ukudalwa kwamacala lapho ohlala / osebenza khona kuyindlela yokuzivikela wena lomakhelwane wakho ekuphazanyisweni ngamacala. Nxa lethekelele iFolosi, qaphelani amaqili azenza athengisa lokhu lalokhuyana labathi bangaliphelekezela endaweni ethile bona belengqondo ezimbi. Buzani emapholiseni eZimbabwe Republic Police (ZRP) Tourism Unit.
Endaweni ezifana le Big Tree, Zambezi Drive kanye le Rain Forest, kulalapho elifika khona kungelabantu. O“tsotsi” bayakwazi lokho. Silusizi ngoba yikho lapho okwabulawelwa khona unkazana weMosi oa Tunya High. Kodwa-ke, abacuphi beFolosi bala ukuba isiga esinjalo siphele sinjalo nje! Babatshisa-ke oNhlanganiso Luphahla weOld Pumula loAugustine Ncube wePumula North, babasa emthethwandaba lapho abatholakala khona belecala lokubulala unkazana lo bagwetshelwa ukufela ejele! Abadinga izimota zokubuka idolobho, gadani ama-taxi aqhuba lowomsebenzi ngokusemthethweni.
Abasebenzisa i-internet / website, ngoba angithi lisakhumbula ukuba idolobho leVictoria Falls labikwa ngokusemthethweni ukuba selingelinye lalawo aphambili ngokusebenzisa imitshina yakulezi insuku emisebenzini eminengi egoqela ukuthenga lokuthengiselana ukubhadalana lokunye okunjalo — cyber city. Yikho silikhuthaza ukuthi nxa lifisa ukuqhuba amabhizimusi enu ngaloluhlobo, sebenzisani amankampani aziwayo njalo asemthethweni. Amanye wonke alakho ukuliqila.
Lingasebenzisi indlela lendledlana eziquma egangeni kumbe lapho okwene khona. IFolosi lidolobho lezethekeli ngakho kumele lihlale lilungele inyamazana zonke ezikulowomango kunye lezinanakazana zonke. Ngokunjalo akumangalisi ukuba kube lendawo ezenileyo ngoba konke lokho kwenzelwa ukuhuga izethekeli ukuze zihlangane lenyamazana kanye lasesitaladeni salelodolobho ngokwaso. O“tsotsi” labo bayakwazi konke lokho. Lani lonke mahlabezulu, yazini ukuba linjalo lelodolobho — qaphelani.
Kwezemidlalo, iCID Victoria Falls iphakamise inkomitsho ye 2016 DCIO Matabeleland North Soccer Cup. I Lupane yona yalile ukudadelwa zimpophoma yathi “. . . sisonke ngoba yithi esileNyuvesithi lobukhosi balesisabelo . . .” I-Hwange, egoqela abacuphi baseBinga, ithe ingeke iphoxane lezethekeli zayo yathatha imendulo zesiliva le-bronze kuphela! I-Lupane ithethe inkezo ye-2016 DCIO Matabeleland North Trophy ngemva kokunqoba ama CID wonke kulesosabelo. Sibatshayela ihlombe abacuphi beZRP ngokunqoba empini yezigilamkhuba lasemidlalweni. Impumela le ikhomba ukuba abacuphi benu bakhaliphile bakwethu. Balolwa lusekelo lwenu, lingadinwa.
Lokhu kuvele ngemva kwemidlalo eqhutshelwe eHwange ngoMgqibelo lapho inkokheli yalababacuphi uChief Superintentent Mutadza Lovemore abatshayele khona ihlombe ngokuqhubeka bedazulula amacala ahluphayo (66% overall crime detection rate ngo-2014 lango-2015). Amacala la ngayabe engazakali ukuba adalwe ngubani. Siwacubungula kuze kutshise phansi sivumbulule o“tsotsi” bonke labo ngoba sisekelwa nguzulu. UChief Superintendet Mutadza uthembise ukwengeza inani lemivuzo kumidlalo yomnyaka ozayo.
Nansi impumela yaleyomidlalo: Inguqu yabesilisa — Hwange (02) Vs (03) Victoria Falls; Hwange (02) Vs (04) Lupane; Victoria Falls (04) Vs (01) Lupane. Ibhola lokuqaga – Victoria Falls ibe lamagoli (12), Hwange (09), Lupane (07). Kuma-darts kunqobe abadlali ababili beLupane belandelana kwaphetha iFolosi kwathi iHwange, yangavuni lutho. Umdlalo wokucina ubungowe-chess, kulolwa ingqondo ngemfumbe yabo king, queen labo pony. Igolide liye eLupane, isiliva eFolosi i-bronze yaya eHwange. Siyabonga bakwethu ngokusisekela emsebenzini lasemidlalweni.
Thumelani imibono yenu kunombolo ye WhatsApp u — 0783 185 092 kumbe ebulenjini ku — [email protected] [email protected] / [email protected]
Online Reporter